Mawkyrwat, Jylliew, 28: Ka Krishi Vigyan Kendra (KVK) West Khasi Hills ka la pynlong ïa ka prokram “Achieving Sustainable Development Goals (SDG- Zero Hunger) in Eastern West Khasi Hills District, through Technology Intervention” halor ka jing-thmu ban rat dyngkhong ïa ka jingïap-thngan jingkyrduh bam hapoh ka district ha ka 27 tarik u Jylliew, 2023 ha ophis jong ka KVK, West Khasi Hills.
Ïa ka prokram la bei tyngka da ka CM’s Catalytic Fund hapoh jong ka SDG (2022-2023) ha kaba la plie ïa ka da u Deputy Commissioner jong ka Eastern West Khasi Hills District, u bah G. Kharmawphlang, IAS, uba la long kum u kongsan ha kane ka sngi.
Ha ka jingkren u kongsan, u la pynshai ba ka ktien ‘sustainability’ ka mut ban ïeng ha la ki jong ki kjat bad ïa kane lah ban kynjoh da ka jingtrei shitom jong ki nongrep. U kyntu ba ki dei ban kin nang pynbha pynroi ïa ki jingdon jingem ha ki jaka ba ki don da kaba ki pyntrei bha, ïatreilang bad pyntrei thikna ïa ki programmes ne project ba la pynmih kyrpang da ka sorkar.
“Kane kan ïarap ruh ia ki samla kiba la pyndep jingpule bad ki bym ïoh kam”, ong u DC. Ha kajuh ka por u la ai khublei ruh ïa ka Chief Minister’s Office ba la bei tyngka ban pyntreikam ïa kane ka projek ka ban long ka jingmyntoi ïa kiba bun.
U kongsan ha ka jingkren jong u u la ai mynsiem ruh ïa ki nongshimbynta ba kin leh ruh kiwei pat ki kam pynroi lait na ka rep ka riang kata kum ka tourism, namar ha kane ka thaiñ bun ki jaka kiba lah ban khring ïa ki nong-jngohkai pyrthei. Ha kaba kut jong kane ka program la sam sha ki nongrep ïa ki synduk ri ngap, ki symbai jhur bad ki symbai khun syiar, ki jingbam syiar bad kumjuh ki dawai ïada.
Ka kong L. Warjri, Senior Scientist & Head, KVK, West Khasi Hills ka la batai ba yn jied tang ïa ki nongrep kiba don jingmut bad shimkhia kum ki nongïoh bynta kiba dei na kane ka distrik bad ka la kyrpad ba ki dei ban pyntrei tikna bha ïa kine ki buit stad thymmai ha ka rep ka riang bad ri jingri bad ba kin ïoh jingtip ba kham bniah lyngba ki lad jinghikai bad ki jingpyni na ki Subject Matter Specialists (SMSs) jong ka KVK.
Ka la ong ruh ba kane kan ïarap ban pynpoi sha ka thong jong ka program, ban pynkiew ïa ka ïoh ka kot ban pyndap bam katkum ka jingthmu jong kane ka SDG. “Ka jingmyntoi ka long ruh ban pynduna ïa ka jingwanrah ki mar bam na shabar ka jylla bad pyndap bam hapoh ka distrik”, ong ka kong L. Warjri.
Ha kane ka prokram la ai ruh ïa ka technical presentation na u Dr. Ereneus K. Marbaniang, SMS Extension shaphang ki 12 tylli ki buit stad thymmai halor ka rep ka riang bad ri jingri bad kumno yn pyntyllun ïa ka jingthmu jong kane ka SDG programme.
Kiba la ïadonlang ha kane ka prokram ki long ka kong V. Hynniewta, Addi-tional Deputy Commis-sioner, Eastern West Khasi Hills District, u bah W. Massar, Assistant Commis-sioner, Eastern West Khasi Hills District, ki dkhot na ka SDG Cell, State Planning Department, Secretariat, jong ka sorkar Meghalaya, Shillong ryngkat ka jingïadonlang ki 58 ngut ki nongrep na ka distrik hi baroh kawei. Lah pynwai ïa ka programme da ki kyntien ai khublei na u bah H. Sungoh, Farm Manager, KVK, West Khasi Hills.
