Pynlong ka KJSU da ka jingïakynduh lang bad sam da ki khusnam ban pynshlur ïa ki samla pule bad ki Khasi ha Guwahati

Nongpoh, Risaw 25: Ka Khasi Jaintia Students Union, (KJSU), Guwahati Unit kum shi bynta ban pynshlur ïa ki samla pule bad kito ki samla kiba trei ba ktah ha Nongbah Guwahati kumba ka la ju leh man la u snem ban pynlong ïa ka jingïakynduh lang bad ban sam ïa ki khusnam bapher bapher bad mynta u snem 2022 ruh kane ka Union ka la pynlong ïa ka jingïakynduh lang bad sam ïa ki khusnam naduh ki samla pule kiba la pass bha ha ki examination bapher bapher bad ruh wat kito kiba trei kum ki nonghikai bad ki nongtrei ha ka tnad ka koit ka khiah kiba hap hapoh ka Nongbah Guwahati.
Na ka liang ka Khasi Jaintia Students Union, Guwhati Unit ha kine ki ar snem kam shym la lah shuh ban pynlong ïa kane ka jingïakynduh lang ki samla pule Khasi bad ki nongtrei Khasi ha Guwahati na ka daw ka jingdon ka khlam COVID-19 bad hadien ba la pynsynjor ïa ki kyndon ha kane ka kynti jong u snem 2022 ka la shim biang ïa ka sienjam ban pynlong ïa ka jingïakynduh lang ki samla bad ruh ban sam da ki khusnam kaba long shi bynta ban pynhlur ïa ki samla kiba dei ki paradoh ki parasnam bad ruh ban don ka jingïatrei lang na ka bynta ka bha ka miat jong ki samla Khasi kiba don hapoh ka Nongbah Guwhati.
Ïa kane ka jingïakynduh lang bad ka jingsam ïa ki khusnam (Annual Fresher cum Farewell Meet 2022) la pynlong ha Catholic Church Hall, Six Mile, Guwahati bad u Bah Kyrmen Shylla, u myntri ka sorkar Meghalaya ba dei ïa ka tnad Social Welfare u la wan ban shim bynta kum u kongsan bad la u Bah Eugene Son Lyngdoh, MLA ka Mawphlang kum u symbut kongsan.
La sakhi lang ruh ha kane ka sngi da ka jingdon lang Bah Bajop Pyngrope, MDC ka Rambrai- Jyrngam Constituency, u President ka Sengkmie Khasi Jaintia Students Union, u Bah Treibor R. Suchen, U DSP ka Ri Bhoi, u bah S. Pasleiñ bad kiwei kiwei ki nongïalam bad ki dkhot ka KJSU, Guwahati Unit bad khamtam ki samla pule bad kito ki samla ba trei ba ktah hapoh ka Nongbah Guwahati. Ïa kane ka jingïakynduh lang la pynïaid da u Bah Goldenstar Suchiang. Ha kane ka jingïakynduh lang la sam ïa ki khusnam ha ki ar tylli ki bynta, kawei ka dei ka khusnam ban ai ka jingpynshlur ïa kito kiba trei ba ktah ha nongbah Guwahati naduh ki Nurse, ki Doctor, ki noinghikai, kiba nongai snam (Blood donors) ba la tip kum ka ‘Appreciation Award’ bad kawei pat ka dei ka ‘Mait Shaphrang Award’ ban pynshlur bad ai mynsiem na ka bynta kito ki samla ba pass bha ha ki examination bapher bapher ba ki pule ha Nongbah Guwahati.
La pynphuh pynphieng ruh ïa kane ka lympung ïa kynduh lang ki samla Khasi da ki nongrwai ba la rwai da u Samla Endo Dhar bad ka DJ Young lem bad kiwei kiwei ki jingshad bad ki jingput jingtep ba la pynkhreh da ki samla pule ha katei ka Nongbah Guwahati.
Haba kren ruh ha kane ka sngi, naduh u myntri sorkar ka jylla Meghalaya ba dei peit ïa ka tnad Social Welfare, u Bah Kyrmen Shylla bad u MLA ka Mawphlang, u Bah Eugene Son Lyngdoh, ki la pynpaw ka jingkmen ban ïa don bynta lang ha kane ka lympung, namar ka jingpynlong ïa kum kine ki jingïakynduh lang hapdeng ki samla Khasi ka wan rah ka jingïaieit bad ka jingïajan ban ïa tynrong lem ïa ka eh ka shon bad ka bha ka miat jong ki samla pule bad kiba wan trei sha kane ka jylla Assam ha Nongbah Guwahati.
Ki la kyntu ruh ïa ki samla pule bad ruh kito ki samla kiba la trei sha katei ka jylla Assam khamtam ha Nongbah Guwahati ba ki dei ban don ka jingtylli bad ka jingïatrei lang la ka long ha kano kano ka bynta, namar haba don ka jingïatrei lang bad ka jingïatylli ka wan rah ka jingshongsuk shongsain bad ka jingshngaiñ ïa ki para samla wat la ki pule ne trei shabar na ka jylla Meghalaya.