Nongpoh, Nailar 06: Kum shi bynta ban noh syniang ïa ka imlang sahlang khamtam ïa ki paitbah jongka dong ka thain ban ïarap ïa kiba pang ba shitom bad ïa ki long iing kiba duna ka ioh ka kot kiba bym kot bor ban leit phah sumar ha ki doctor kiba kham biang, ka HNYF Western Zone, Ribhoi District ha ryngkat ka jingïatrei lang bad ka ARHI Hospital mynta ka sngi ki la pynlong ïa ka jingai jingsumar ei ha Patharkhmah CHC.
La sakhi lang ruh ha kane ka sngi ba la pynlong ïa ka jingsumar ei ïa ki paidbah da ka jingdon lang u Sordar Shnong ka Patharkhmah u Bah Petalman Thangkhiew, upresident ka PYC & SWO u samla Remington Syngkli, ka Dr. Incharge ka Patharkhmah CHC ka Dr. K. Lyngdoh lembad kiwei kiwei ki riew rangbah.
Ha kane ka sngi, kumba 250 ngut ei ei ki paidbah ki la wan ban shim bynta ha kane ka prokram ai jingsumar ei ei ia ki paidbah katei ka thaiñ Western Ri Bhoi.
Ka seng HNYF lyngba u President u Samla Pynkhraw Makri bad u Secretary u Samla Teibor Thongni ha kane ka sngi ki la ai khublei kyrpang ïa u Bah A.L Hek uba dei u trai ka Arhi Hospital bad ruh ïa u Bah Aiban Director ka ARHI Hospital bad ruh ïa ka Doctor bad ki nongtrei na ka Patharkhmah CHC, namar dei lyngba ka jingïatrei lang lah ban pynlong ïa kane ka jingai jingsumar ei ba bun ki paidbah ki la ioh jingmyntoi.
Kitei ki nongïalam ki la ong ruh ba na ka liang ka seng ka kyrpad ruh ïa ka ARHI hospital ba kan buh ïa ka Diagnostic centre hakane ka dong ka thain ba Kan long ka jingmyntoi ïa uba bun balang.
Shuh shuh, ki la pynpaw ruh ba kum ka seng ka sngewkhia ïa ka jingeh ba ki nongpang ki mad haba leit ban phah test ïa ki test bapher bapher, ha kaba tang na ka daw ka jingbym don ki jaka test ha Patharkhmah CHC, ki paidbah ki hap ban leit phah test sha Nongpoh, Shillong bad wat sha Guwahati ba kum ka seng ka kyrpad ruh ïa ka sorkar ban phai khmat lem ïa ka jingeh ki paidbah katei ka thaiñ, ki la bynrap.
