Mawkyrwat, ‘Nailur, 11: Ka History Department jong ka Sngap Syiem College Mawkyrwat ka la pynlong ïa ka jingïathir jingmut ne seminar halor ka phang, “Hill State Movement and Emergence of Meghalaya” kum ka dak ban kynmaw burom ïa ka jingdap 50 snem (Golden Jubilee) jong ka jylla ka Meghalaya hapoh jong ka Sngap Syiem College, Mawkyrwat, South West Khasi Hills District.
Ha kane ka Seminar la ïoh ïa ka jingkren na u Principal jong ka Sngap Syiem College, Mawkyrwat, u Dr. K.K. Nongsiej ha kaba u la ban jur ba kum kine ki jingïathir jingmut ban phai dien biang sa shisien ïa kaei kaba ki longshwa manshwa ki la leh bad len lade na ka bynta ban ïada ïa ka hok longtrai jong ngi kum ka jaidbynriew ka long kaba donkam eh.
Ha kane ka ka seminar, u bah Robertjune Kharjahrin, Legal Adviser KHADC u ba long u kongsan u la thir jylliew halor katei ka phang da kaba u la sdang ïa ka jingkren naduh ka por shwa ba ka India kan ïoh laitluid na ki phareng bad kumta ter ter kat haduh ba ka Indira Gandhi kaba dei ka Prime Minister jong ka Ri India ka la pynbna paitbah ba ngi la ïoh ïa la ka jong ka jylla ba pura ha ka 21 tarik u Kyllalyngkot, 1972.
