Pynlong ka Hima Khad-ar Lyngdoh da ka tamasa, ‘Pynneh La Riti’ shi bynta ka shad Sajer ha Ri Bhoi

Nongpoh, Ïaïong 05: Ban pynneh pynsah ïa ki riti ki dustur bad ka jinglong tynrai kum ki jaid bynriew ba tip briew tip blei, ka Hima Khad-ar Lyngdoh ha ka lama ka Khad-ar Lyngdoh Confederation on Sports, Art and Cultural ki la pynlong ïa kawei na ka tamasa ba la tip kum ka Tamasa, “Pynneh La Riti’ kaba dei shi bynta ka Shad Sajer kaba dei kawei na ka jingshad tynrai jong ka Hima Khad-ar Lyngdoh ha Ri Bhoi District.
Ïa kane ka tamasa la pynlong ha Madan Byrnihat ha Ri Bhoi District, ha kaba la wan ban shim bynta da u MLA ka Umsning, u Bah Jason S. Mawlong kum u kongsan bad u MLA ka Jirang Constituency, U Bah Sosthenes Sohtun kum u symbut kongsan.
Nalor ki khun ki hajar jong ka Hima Khad-ar Lyngdoh bad ki kynhun kiba la shim bynta ha ki jingshad tyrnai bapher bapher, ha kane ka sngi la don ryngkat ruh naduh u MDC ka Jirang, u Bah Victor Rani, u Syiem barim ka Hima Mylliem, u Paiem Laborious Syiem, u Paiem Wanphrang Syiem Nongshai, Syiem ka Hima Khad-ar Lyngdoh, u Bah Stoin Syngkli, Secretary ka Hima, ki longsan ki mansan ka Hima bad kynthup kiwei kiwei ki nongïalam, ki rangbah shnong. Ïa ka jinglehkmen ïa kane ka tamasa la pynïaid da u Bah Augustine Wahlang, uba dei u Chairman katei ka Confederation.
Kum ban pynkynmaw, kane ka Confederation ha ki snem ba la leit noh ka la ju pynlong ruh bun tylli ki tamasa bad ka thong hi ka long ban wan rah ïa ka jingïatylli bad ka jingïatrei lang na baroh ki Shnong, ki Raid bad ki Hima na ka bynta ban pynneh pynsah ïa ka riti ka dustur bad ka rukom long tynrai kaba ngim dei ban but tynneng ïa ka kolshor jong kiwei.
Lyngba jong kane ka sngi ka kynhun ki nongshad tynrai ki la pyni ruh la ki sap ki phong bapher bapher ban shad ïa kita ki jingshad tynrai ba kynthup kum ka shad rah kynthei, ka shad krut lyngkha, ka put talwak, ka put muin bad kiwei kiwei ki jingshad tynrai bad ka thong hi ka long ban pynriew spah ïa la ka jong ka tynrai ban im ka ri bad ka jaid bynriew haba dang im ka riti ka dustur ne kata ka kolshor.
Haba kren ruh ha kane ka sngi kum ki kongsan jong kane ka tamasa, u MLA ka Umsning, u Bah Jason Mawlong bad u MLA ka Jirang, u Bah Sosthenes Sohtun ki la pynpaw ka jingkmen ban ïa don lang ne ban sakhi ïa kane ka tamasa ba ka thong hi ka long ban pynneh pynsah ïa ka ka jinglong tynrai ka jaid byrriew.
Kitei ki nongmihkhmat na Ri Bhoi ki la ai ka jingïaroh ruh ïa ka Hima Khad-ar Lyngdoh Confederation on Sports, Arts and Culture kiba la shim khia ban pynlong ïa kum kine ki jaid tamasa, namar dei ha kum kine ki rynsan kiba ngi lah ban iohi ne sakhi ïa kita ki jingshad, ki jingrwai bad ka jingtem tynrai kaba la ïalam da ki longshuwa ki manshuwa.
Kum ki nongmihkhmat paidbah ruh ki la kular ban dang ai ka jingkyrshan ïa kane ka Hima Khad-ar Lyngdoh ba kin dang bteng ban pynlong ïa kum kine ki tamasa bad kumjuh ruh ban lum ban lang bad ban pynïatylli naduh ki Shnong, ki Raid bad ki Hima na ka bynta ban lah ban pynneh pynsah ïa la ki riti ki dustur kumba la ïalam da ki menbarim bajah.
Kiwei kiwei kiba la ai jingkren ha kane ka sngi ki kynthup ruh naduh u Paiem Wanphrang Syiem, Syiem ka Hima Khad-ar Lyngdoh, u Paiem Laborius Syiem bad ruh u MDC ka Jirang, u Bah Victor Rani, ha kaba ki la pynpaw ïa kata ka jingkmen ban don kum kine ki tamasa bad ki don ruh kawei ka mynsiem ban dang pynim ne pynneh pynsah ïa ki riti ki dustur ha kaba kano kano ka jaid bynriew kaba ym don la ki riti ki dustur ka dei ka jaid bynriew ba la jah noh bad dei namar kane ka daw ngi hap ban pynneh pynsah ïa la ka riti ka dustur kaba long ka jingithuh ïa kano kano ka jaid bynriew kaba don ha kane ka ri jongngi.