Williamnagar, Nailar 31: Ka ophis District School Education Officer, East Garo Hills, ka la pynlong ïa ka District Level Science Seminar kaba shi sngi halor ka phang, “The quantum age begins : Potentials and Challenges” ha DRDA Hall – II, Williamnagar, ha kaba ka Additional Deputy Commissioner, Ripamchi N Sangma, la long kum ka kongsan.
Haba kren ha kane ka sngi, ka kongsan la pyntip ïa ki samla pule kiba ïa shim bynta na ki skul bapher bapher na ka district ba ka rta ban wanrah ïa ki jingkylla ha ka kam technology ka shong ha ka jingsngewthuh bad ka rukom aplai ïa ka kam mechanic bad ong ba ka pyrthei ka la pynkhreh ha kaba ïadei bad kane ka bynta bad kiwei kiwei.
Katba u Samuel K Sangma, District Science Supervisor (DSS) bad Sub-Divisional School Education Officer (SDSEO), u la ai ïa ki kyntien sdang bad pyntip ruh ïa ki samla pule ba kito kiba la shah jied ki sa leit ban ïashim bynta ha ka state level science seminar.
Ha kane ka sngi ki khynnah skul na ki skul bad ki college bapher bapher na ka district, ki la wanrah ïa ki model bad ki poster bapher bapher halor ka phang ba la buh.
Na ka liang u District School Education Officer, SD Marak, u la ai ki kyntien pdiang sngewbha ha kane ka sngi ha kaba u la ïathuh shaphang ki jingdonkam ki lad ai jingmyntoi bad ki jingeh ha kaba ïadei bad ki jingkiew ki jingïaid jong ki kam technology. Ha kane ka sngi la ïoh ruh ki kyntien ai khublei na u SDSEO, Julling K Marak.
