Pynlong ka DoNER ïa ka NE Summit ban kyntiew ïa ka khaïi pateng ha ka thaiñ shatei lammihngi

New Delhi, Naitung 27: Ka Tnad Development of North Eastern Region (DoNER) ka la pynlong ïa ka Rising Northeast Investors Summit 2025 ban kyntiew ïa ka khaïi pateng bad ka jingbei tyngka ha ka thaiñ shatei lammihngi. Baroh, ha ka Summit bad ki roadshow jong ka shuwa ka jingïalang ki la sakhi ïa ka jingthmu ban bei tyngka kaba T.4.48 lak klur lyngba ka Memoranda?of ?Understanding (MoU), ki Letter of Intent, bad ki nongïalam ba tbit na ki nongbei tyngka shimet, ki public sector undertaking, bad ki karkhana ba heh.
Ki Sorkar Jylla ki ïatreilang bad baroh ki nongbei tyngka na ka bynta ban pynskhem ïa kine ki MoU.
Ka bording bad ka jingpynkhreh marbam bad kiwei kiwei ki kam ba ïadei bad kane ki long napdeng kiwei kiba la khring bun eh ki jingtyrwa ban bei tyngka ha kane ka Summit: Ka Sorkar India ka pyntreikam ïa ka skhim Uttar Poorva Transformative Industrialization (UNNATI) na ka bynta ban pynkhlaiñ ïa ka jinglong jingman ki kam karkhana bad ban khring ïa ki nongbei tyngka ba thymmai na ka bynta ban pynmih ki lad ïoh kam ha ka thaiñ shatei lammihngi. Ki jingai jingmyntoi ba la ai hapoh ka skhim UNNATI ki long (i) Capital Investment Incentive; (ii) Central Capital Interest Subvention Incentive; bad (iii) Manufacturing & Services Linked Incentive.
Shuh shuh, ki Sorkar Jylla ki dang shim ruh ïa ki sienjam bapher bapher ban pynsuk ïa ka jingbei tyngka, kiba nalor kiwei pat, ki kynthup ïa ka single window clearance, ka jingthaw ïa ka tnad ban kyntiew ïa ka jingbei tyngka, ka jingthaw ïa ki land bank, ki jingai jingmyntoi na ka bynta ki jingbei tyngka bad kiwei kiwei.
Ka Tnad DoNER ka dang ïatreilang ruh bad ki Jylla bad kiwei kiwei ki Nongshim bynta na ka bynta ban pynshong nongrim bha ïa kine ki Jingtyrwa Bei tyngka.
Ki Sorkar Jylla ki kyntiew ïa ka jingpdiang ïa ki teknoloji kiba duna ka jingpynmih carbon bad ki rukom treikam kiba pynneh pynsah ïa ka mariang ban kot sha ka jingkiew ka ïoh ka kot katba dang pynneh pynsah ïa ka jinglong jingman jong ka mariang ha ka thaiñ shatei lammihngi kaba ñiewkor ïa ka mariang.
La phaikhmat kyrpang sha ki projek ki bym wanrah ïa ki jingktah kiba shyrkhei bad la kheiñ ïa ki kum ki karkhana kiba khuid, kiba wanrah ïa ka jingktah kaba duna ïa ka mariang ha ka thaiñ.
Ïa kane ka jingtip la ai da u Myntri Khynnah ka Tnad Development of North Eastern Region Dr. Sukanta Majumdar ha ka jubab ba shu thoh ïa ka jingkylli ha Lok Sabha.