Nongpoh Nohprah 19: Kum kawei na ka thong ban pynmih pisa na ka bynta ban pyntyllun ïa ki kam bapher bapher ha ki kam shakri jong ka Nongtluh Mihngi Pastorate CE Union, ka Nongtluh Mihngi Pastorate CE Union mynta ka sngi ka la pynlong da ka “Sale of Work Cum Food Fest” kaba dei kawei na ka tamasa ba la shim bynta shirthem da ki khun samla katei ka Pastorate.
Ïa kane ka Tamasa jong ka iew ïa die ïa thied ne ka tamasa bam tynrai la wan ban plie paidbah da u Bah Mayral Born Syiem, MLA ka Nongpoh kum u kongsan bad la sakhi lang ruh ha kane ka sngi da ka jingdon lang u Rev N.W Marsing u Pastor Incharge ka Nongtluh Mihngi Pastorate C.E Union, u Thymmenbasan B.L .Malai President Nongtluh Mihngi Pastorate C.E Union lem bad ki parabangeit ka katei ka Pastorate kiba la ïa mih paidbah ban pynphuh pynphieng ïa kane ka tamasa bam tynrai.
Ki khun samla ba hap ha kane ka Pastorate ki la ïa mih ryntih ban pynkhreh pynkhrum ïa baroh ki jaid jingdie bad ki bam tynrai bapher bapher naduh ki jhur ki jhep, ki soh ki pai, ha kaba ïa kane ka tamasa la pynlong ha ka Balang Presbyterian Mawlong.
Kum u MLA ka thaiñ, u Bah Mayral Born Syiem u la ai ka jingïaroh ïa ka Pastorate kaba la pynlong ïa kane ka tamasa, ha kaba ka thong ka long ban pynmih pisa na ka bynta ki jingdonkam bapher bapher hapoh ka Pastorate bad u kyrmen skhem ba kane ka jingpynlong ïa kane ka tamasa ïa die ïa thied ne ka tamasa bam tynrai kin lah ban pynmih pisa na ka bynta ban kyrshan ïa ki kam shakri bapher bapher hapoh ka CE Union.
