Pynlong ka CCA NE-I ïa ka Digital Life Certificate (DLC) Campaign ha ophis BSNL Tura
Shillong, Naiwieng 06: Ka Office of the Controller of Communication Accounts (CCA), North East India Telecom Circle ka la pynlong ïa ka prokram ai jingtip mynta ka sngi hapoh ka Digital Life Certificate Campaign 4.0 ha ophis BSNL, Tura, West Garo Hills, ka prokram kaba pynlong ha baroh kawei ka ri. Ka prokram ka thmu ban plié lad bad ban pynshlur ïa ka jingai ïa ki Digital Life Certificate (DLC) ïa kito kiba ïoh bai bam tymmen na ka BSNL bad DoT lyngba ka Jeevan Pramaan application.
Kum shi bynta jong kane ka sienjam, kumba 1000 ngut ki nongïoh bai bam tymmen kiba la dei ban kut noh ki Digital Life Certificate jong ki ha u Naiwieng 2025 ki dei kiba la mut ban peit hapoh ka Nationwide DLC Campaign 4.0, ba la pynlong da ka tnad Pension & Pension’ Welfare (DoPPW). Ha kaba ïahap bad ki sienjam Digital India bad Ease of Living jong ka Sorkar India, ka tnad ka pyntreikam ruh ïa ki lad ai jingïarap bapher bapher kynthup ïa ki camp na ka bynta ka koit ka khiah bad ki jingpynsngewthuh shaphang ka jingshngaiñ ha ka kam cyber, ban pynthikna ba kito kiba ïoh bai bam tymmen kin ïoh ïa ka jingïarap ha ka por kaba biang na ka bynta ban ai ïa ka DLC bad ban ïoh ïa ki jingshakri ba kongsan ha kawei ka rynsan.
Haba ai jingkren ha kane ka jingïalang, u Shubhranil Das, Joint Controller of Communication Accounts, u la kren shaphang ka jingdonkam jong ka jingpynrung kyrteng lyngba ki lad digital bad u la pyni ruh ïa ka jingpyndonkam ïa ka Jeevan Pramaan App, kaba lah ban ïoh ha ka Play Store na ka bynta ban aiti khlem jingeh ïa ki life certificate. U la ban jur ba kito kiba ïoh bai bam tymmen ki bym lah ban pynrung kyrteng da ka lad digital ki lah ruh ban jied ban pynrung kyrteng offline. Ïa kane ka kam la pyntreikam ha kylleng ki 171 tylli ki nongbah ha ka ri mynta u bnai Naiwieng, ha kaba kito kiba ïoh bai bam tymmen ki dei ban pynthymmai ïa ki syrnot jong ki man la u snem.
Ha kane ka jingïalang, katto katne ngut ki nongïoh bai bai bam tymmen ki la aiti ïa ki Digital Life Certificate jong ki ha katei ka jaka. Ha kane ka prokram la ïohi ïa ka jingïashim bynta jong ki heh ophisar ba kynthup ïa u Giridhar Tayung, Sr. Accounts Officer; Ka Debashree Sharma, ka Accounts Officer; u Kundal Kumar Das, Assistant Accounts Officer bad u Ginmun Valte, Accounts Officer, kiba la ai jingkyrshan ha ka jingpynrung kyrteng DLC bad pynbeit ïa ki jingeh jong kito kiba ïoh ïa ka bai bam tymmen.