SHILLONG, Lber 27: Ka Assam Rifles ka la pynlong ïa ka bynta kaba ar jong ka Assam Rifles Annual Women’s Football Tournament na ka bynta ki kynhun ha kylleng ki jylla ka thaiñ shatei Lammihngi kaba la ai kyrteng kum ka Sentinels Cup kaba ïahap bad ka nam jong ka Assam Rifles kum ‘Ki nongïada jong ka thaiñ shatei lammihngi’.
Hynniew tylli ki kynhun ïalehkai phutbol jong ki kynthei na Meghalaya, Assam, Nagaland, Tripura, Arunachal Pradesh, Mizoram bad ka Assam Rifles ki la ïashim bynta ha kane ka lympung ïalehkai. ïa ka bynta kaba nyngkong jong ka lympung la pynlong ha Lokra, Assam.
Ha ka Semifinal ka jingïakhun kalong hapdeng ka kynhun jong ka Assam Rifles bad ka Meghalaya bad ha ka Semifinal kaba ar ka jingïakhun kalong hapdeng ka kynhun na Tripura bad Assam. Ha ka final ka jingïakhun ka long hapdeng ka kynhun na ka Assam Rifles bad ka Tripura ha ka 27 tarik Lber 2025 ha Laitkor Garrison jong ka Assam Rifles ha nongbah Shillong.
Ka bynta kaba ar jong ka Sentinels Cup ka la sdang ha ka 16 tarik Lber 2025 ha Lokhra, Assam lyngba ka jingïalang plie paidbah kaba iphuh iphieng. Man ka jingïalehkai ha kane ka lympung la ïalehkai bha da ka mynsiem jong ki nongïakhun.
Ha kane ka lympung la ïohi ïa ka jingkiew bad jinghiar ha ki kyrdan jong ki kynhun ryngkat bad katto katne ki jingïalehkai kiba la ïakhun tyngeh. Ki ar tylli ki kynhun kiba kynsai tam ki la ïakhun na ka bynta ka phainal. Ki ar tylli ki kynhun kiba tbit tam ki la ïakhun ban ïoh ïa ka khusnam bad ka khusnam pisa kaba T.3,50,000 na ka bynta ka lahduh.
Ha ka phainal jong ka Sentinel Cup la ïakhun hapdeng ki kynhun jong ka Assam Rifles bad ka Tripura. Ka kynhun na ka Assam Rifles ka la long ka lahduh jong ka bynta kaba ar jong ka Sentinels Cup Football Tournament 2025.
ïa kane ka lympung ialehkai la plie paidbah da u Lt Gen Vikas Lakhera, AVSM, SM, Director General Assam Rifles & ka Vibha Lakhera, President jong ka ARWWA. ïa ki takma na ka bynta kane ka jingïalehkai la sam da ka Vibha Lakhera, President jong ka ARWWA bad ïa ki trophy la sam da u Lt Gen Vikas Lakhera AVSM, SM.
La pynbyrngia ïa ki nongpeitkai da katto katne ki jingïalehkai phutbol ba la pyni da ki nongïalehkai phutbol kiba tbit, kiba don ka jingangnud bad kiba ïalehkai bha na baroh ar tylli ki kynhun.
Ka Assam Rifles, ka kynhun shipai kaba sngew sarong ban long ka ‘Paralok jong ka thaiñ shatei lammihngi’ ka kyntiew ïa ka jingialehkai kum ka atiar ban pynshlur ïa ki samla ban kiar na ki kam lehnoh bad ki jingdih buaid bad ruh ban ithuh ïa ka sap kaba bun jong ka thaiñ shatei lammihngi na ka bynta ka jingkiew shaphrang ha ki por ban wan.
Ka Assam Rifles ka don ruh ka jingïateh kular bad ka Bhaichung Bhutia Football Academy ha ka Assam Rifles Public School (Sports) jong ka na ka bynta ban sei madan ïa ka sap ïalehkai phutbol jong ka thaiñ Shatei Lammihngi da ka jingthmu ban kyntiew ïa ki sienjam Khelo India Abhiyan bad Fit India Movement jong ka Sorkar India.
