SHILLONG, Naiwieng 12: Ka Army Public School Shillong ka la pynlong ïa ka Annual Sports Meet kaba ar sngi ha ka 11 bad 12 tarik Naiwieng, 2025 ha madan ïalehkai jong ka skul. Ha ka jingïalang plie pyrda la wan kongsan da u Kanwar Jintendra Singh, SM, u Chairman jong katei ka skul,
Kane ka lympung ka la pynïasoh lang ïa ki khynnah skul, ki kmie ki kpa bad ki nonghikai ban rakhe ïa ka mynsiem ïalehkai, ka jingïatreilang bad ka jingïakhun kaba koit ba khiah.
La pyn-i-phuh-i-phieng ïa ka sngi sdang da ka ‘Pom Pom Drill’ ba bun rong da ki khynnah klas 1 bad 2 bud sa ka jingpyni Yoga, ‘Soulful Stretches’ na ki khynnah klas 6, 7 bad 8. Ki khynnah ki la ïashim bynta ha ka March-past ba la lamkhmat da ki School Captain bad baroh san tylli ki kynhun ba ïa shim bynta: ba kynthup ïa ka NCC cadet, Gandhi House, Naidu House, Nehru House bad ka Radhakrishnan House.
Ha ka sngi pynkut la wan Kongsan da u Lt Gen Mohit Wadhwa, SM, GOC 101 Area bad Senior Patron jong katei ka School ha ka jingïadon lang u Maj Gen Naveen Kumar Thapliyal, COS 101 Area kum u symbud kongsan.
Ka jingïalang ka la sdang da ka drill kaweh lama lane ‘Waving Flags’ da ki khynnah klas 3 haduh 5 bad ka jingshad Zumba da ki khynnah klas 6 haduh 8. Ki jingïalehkai ïakop mareh kum ka Relay bad Sprints ki la tbeh ïa ka mynsiem ïakhun jong ki khynnah ha kane ka sngi. Ka sngi ka la nang shongshit shuh shuh da ka jingïakop tan tyllai lane ka ‘Tug of War’ hapdeng ki nonghikai bad ki khynnah jong kane ka skul.
Ka jingïalang kaba kongsan tam jong kane ka sngi ka long ka jingpynbna ïa ka ‘Cock House’, ka nam kaba kongsan tam jong kane ka Sports Meet, kaba la khur da ka Radhakrishnan House hadien ba ka la khur bun point tam ha baroh ki jingïalehkai.
Hadien ka jingïalang sam khusnam, u Kongsan u la ai ïa ki symboh kyntien kiba ai mynsiem, da kaba ai khublei ïa ki samla pule na ka bynta ka jingïalehkai kaba itynnat, ka jingïatylli kum ka kynhun, bad ka jinglong ba ryntih.
U la pynpaw ruh ïa ki jingjop jong ka skul ha ki kam Scholastic bad Co- Scholastic bad u la ïaroh ruh ïa ki nonghikai na ka bynta ka jingaiti lut bad ka jingtrei shitom jong ki ha ka ban pynshlur ïa ki khynnah skul bad hikai ïa ki shaphang ka mynsiem ïalehkai, ki jinglong nongïalam kumjuh ruh ban ïalam lynti ïa ki ha ki jingpule. Da kine ki kyntien u la pynkut ïa ka Sports Meet kaba sah jingkynmaw.
