Shillong, Naitung 03: U Myntri Sorkar Pdeng ba dei khmih ïa ka Tnat Kam Pohïing bad Cooperation, Amit Shah u la ong ba ki 3 tylli ki criminal laws ba thymmai kiba la pyntreikam ha kylleng ka ri naduh mynta ka sngi kalong kaba phaikhmat sha ka jingpynïoh ïa ka hok ban ïa ka jingpynshitom, bad kaba phaikhmat sha ki lanot.
U la ong ba ha ki ain ba thymmai ka jingphaikhmat kyrpang ka dei ban pynïoh ïa ka hok ha ka jaka ka jingpynshitom, ka jingpynsted ban ai ka jingbishar bad ka jingkloi ban pynïoh ïa ka hok ha ka jaka ban pynslem bad pynthikna ka jingïada ïa ki hok jong ki lanot.
Ha ka jingai jingkren sha ki nongpathai khubor ha New Delhi, u Amit Shah u la ong ba ki la don ki jingsngewthuh bakla ba la pynsaphrïang shaphang kine ki ain ba thymmai, da ka jingthmu ban pynkulmar jingmut ïa ki paidbah shaphang kine ki ain. U la ong ba man ka bynta jong ki ain ba thymmai kidei kiba la ïamir jingmut sani bad kito kiba don bynta ha kane ka kam la saw snem bad ym don kano kano ka ain ha ka Indïa kaba la laitluid ba la ïamir jingmut haduh katne.
U Myntri Kam Pohiing u la ong ba hadien 77 snem jong ka jingïoh ïa ka jinglaitluid, ka kam ai jingbishar ïa ki kam beain ka la ïahap bha bad ka jinglong jingman jong ka ri bad ïa kine ki lai tylli ki ain ba thymmai la pyntreikam ha man ki thanat jong ka ri naduh mynta ka sngi.
U Amit Shah u la ong ba ïa kine ki ain la bujli ïa ka jingpynshitom da ka hok, ka jingpynsted ban ai ka jingbishar bad ka jingkloi ban ïoh ïa ka hok ha ka jaka jong ka jingpynjlan.
Ki aiñ ba mynshuwa ki ïada tang ïa ki hok jong ki pulit, hynrei kine ki ain ba thymmai mynta ki don ki kyndon ban ïada ïa ki hok jong ki lanot bad ki nongujor ruh kumjuh. U Amit Shah u la ong ba kine ki lai tylli ki ain ba thymmai ki pyni ïa ka mynsiem jong ka Indïa ha baroh ki kam ai jingbishar ha ki kam beain ha ka ri.
U la ong ba ki don shibun ki bynta ha kine ki ain ki ban ïarap ïa ki briew jong ka ri. U la ong ba ha kine ki ain, ki bynta kiba don jingthut kiba la bteng naduh ka por jong ki nong Bilat ki la wanrah jingeh ïa ki briew bad la weng noh ïa kine bad la wanrah ïa ki bynta kiba thymmai kiba ïahap bad kane ka por mynta.
U Myntri ka tnat Kam Pohiing u la ong ba ha kine ki ain ki section bad ki dkhot ba kongsan ki dei kiba la wanrah ha kaba ïadei bad ka Riti Synshar jong ka Indïa. U la ong ba la phaikhmat shuwa sha ki kam beain pyrshah ki longkmie bad ki khynnah.
U la ong ba da kaba wanrah ïa ka dkhot kaba thymmai ha ki kam beain pyrshah ïa ki longkmie bad ki khynnah kaba don 35 tylli ki section bad 13 tylli ki jingpynbïang, la wanrah shuh shuh ka jingsngewlem ha kine ki ain. U la ong ba ym shym la pynbïang ha ki ain ba mynshuwa na ka bynta ka jingpynïap ki paidbah hynrei ha kine ki ain ba thymmai, ha ka sien kaba nyngkong la batai shai ïa ka jingpynïap ki paidbah bad la buh ïa ka jingpynshitom kaba khlain ïa kane.
U Shah u la ong ba ha ki ain ba thymmai, ïa ka ain sedition ba la wanrah da ki nong Bilat la weng noh. U la ong ba la wanrah ïa ka section ba thymmai ïa ki kam pyrshah ïa ka ri ha ka ain ba thymmai ha kaba la buh ïa ka jingpynshitom kaba khlain ïa kito kiba ktah ïa ka jingïatylli bad ka jingtylli jong ka Indïa.
U Amit Shah u la ong ba kine ki lai tylli ki ain ba thymmai kin tei ïa ka kam ai jingbishar kaba bïang tam hadien ba la pyntreikam pura ïa ki. U la ong ba la pdïang ïa ka teknoloji ha kine ki ain ba thymmai bad la peit lypa ba yn lah ban pyndonkam ïa ki teknoloji ba wan ha kine ki 50 snem ban wan.
U la ong ba 99.9 % ki thanat ha kylleng ka ri ki dei kiba la pyndonkam ïa ki kor computer bad ka kam ban sdang ïa ki e-record ka la sdang naduh u snem 2019. U la ong ba ka Zero-FIR, e-FIR bad charge sheet kin long digital ha ki ain ba thymmai. U Shah u la ong ba ki ain ba thymmai kin buh da ka por ban pyndep lut ïa ki kam, bad haba pyntreikam pura ïa kane ka ain kan pynkut ïa ka jinghap ap shirta ban ïoh ïa ka hok.
U la ong ruh ba lah ban pan ïa ka jingbishar haduh ka kyrdan jong ka Supreme Court ha ki 3 snem naduh ba la buh ïa ka FIR.U Myntri ka tnat Kam Pohiing u la ong ba kine ki ain ba thymmai ki dei ban leh ïa ka jingwad forensic ha ki kam beain ba lah ban pynshitom da hynniew snem ne palat, kane kan pynstet ïa ka jingai ïa ka hok bad kyntiew ïa ka jingpynshitom sha ka 90%.
U Shah u la ong ba ka jinghap leh forensic ha kine ki ain ba thymmai ka dei kaba ka Sorkar ka la pynkhreh lypa da kaba tei ïa ka National Forensic Science Laboratory ha u snem 2020.
U la ong ba yn donkam ïa ki briew ba la pyntriem ha kane ka kam ha ka ri bad ba yn don40,000 ngut ki briew kiba la tbit ha kane ka kam hapoh lai snem.
U la ong ba ka Kynhun Myntri Sorkar Pdeng dang shen ka la rai ban sdang ïa ki jaka treikam jong ka Forensic Science University bad seng 6 tylli ki Central Forensic Laboratory sa ha 9 tylli ki jylla.U Amit Shah u la ong ba ka Bharatiya Sakshya Adhiniyam 2023 ka la pyndonkam ruh ïa ka teknoloji ha kaba ïadei bad ki sakhi.
U la ong ba la buh shibun ki bynta ban kyntiew ïa ka jingbha jong ki sakhi digital. Mynta la khein ïa ki server log, ki sakhi jong ki jaka bad ki voice message kum ki sakhi.
U Shah u la ong ba kine ki lai tylli ki ain kin don ha baroh ki ktien kiba don ha ka Eighth Schedule jong ka Riti Synshar bad ba ki jingbishar jong ki iingshari ruh kin long ha kine ki ktien.U Myntri ka tnat Kam PohIing bad Cooperation u la ong ba ka Tnat Kam Pohiing jong ka Sorkar Pdeng, ki tnat kam pohiing jong ki Sorkar bad ka Tnat Justice ki la shim shibun ki sienjam ban pyntreikam ïa kine ki ain.
U la ong ba ha ki ain ba thymmai la wanrah ïa ki bynta katkum ka jingïadei bad ki por ba mynta bad ba ïa kito ki bynta kiba don jingkulmar ki dei kiba la weng noh namar kine ki wanrah jingjynjar ïa ki briew.
U Shah u la ong ba katkum ka thong ban ai jinghikai 12,000 ngut ki nonghikai ban ai jinghikai ïa kumba 22.5 lak ngut ki pulit, palat 23,000 ngut ki nonghikai ki la ïoh jinghikai.
U Shah u la ong shuh shuh ba la ïamir jingmut halor kine ki lai tylli ki ain ha ka Lok Sabha haduh 9 kynta bad 29 minit ha kaba 34 ngut ki dkhot ki la ïashim bynta bad ai ki jingmut jong ki katba ha ka Rajya Sabha la ïamir jingmut haduh 6 kynta bad 17 minit ha kaba 40 ngut ki dkhot ki la ïashim bynta.
U la ong ba ka don ka jingpynsaphrïang khubor thok ba la wanrah ïa kine ki ain hadien ba la weng ïa katto katne ki dkhot ka parlïament. U la ong ba kine ki dkhot ba shah weng ki la don ka lad ban wan sha ka iingdorbar thaw ain bad ïashim bynta ha ki jingïamir jingmut ban ai ïa ki jingmut jingpyrkhat jong ki hynrei ym shym la don ba wan leh ïa kane.
