Nongstoiñ, Jymmang 15: Kum ka jingpynkhreh ïa ka International Day of Yoga (IDY) ha ka 21 tarik Jylliew, ka ophis jong ka Regional Outreach Bureau Shillong ha ryngkat ka Field Outreach Bureau, Nongstoiñ, ha ka sngi saitjaiñ ki la pynlong ïa ka prokram halor ka Yoga ha skul JNV Mawphlang.
Ha kane ka prokram la ïashim bynta da ki khynnah skul, ki nonghikai bad kito kiba trei ha kane ka skul. La pynlong ïa kane ka prokram ban pynsaphriang jingtip shaphang ki bynta bapher bapher jong ka Yoga na ka bynta ka koit ka khiah bad ka bha ka miat. Ka tnad AYUSH bad ka tnat Information & Broadcasting jong ka Sorkar Pdeng, ki la pynlong ïa ki jingrakhe ha ki jaka bapher bapher kum ka jingpynkhreh ïa ka prokram ban pynlong ha ka International Yoga Day.
U Ch. Dineshan, Principal ka skul JNV Mawphlang kum u kongsan bad u Dr Engam Pame, Director, ROB Shillong, ki la kren shaphang ka jingdonkam ban leh Yoga man ka sngi. U Dr. Pame u la ai jingïaroh ïa ki sien jam jong ka tnat AYUSH, ban pynlong ïa ka jingñiew ïa ki sngi shuwa ka International Yoga Day, ha kaba kine ar tylli ki tnat Sorkar Pdeng ki la ïashim bynta ha ki jaka bapher bapher jong ka ri.
Ha kane ka sngi ka jingïakop ai rong ïa ki dur, ka quiz bad ka jingkyntiew jingtip shaphang ka yoga ha ryngkat ka jingleh yoga, ki dei katto katne ki kam ba la pyndep ha kane ka sngi. La ai ruh ïa ki khusnam sha ki nongjop jong kine ki jingïakop. Katba ka Delicia E Jyrwa, Field Publicity Assistant ROB Shillong ka la ai jingkren pynkut.
Kum kine ki prokram yoga la pynlong ruh da ka Doordarshan Kendra Shillong bad Tura na ka bynta ki nongtrei ha kine ki ophis ha ki Doordarshan Studio Complex bapher bapher.
Mynta u snem, katba ka ri ka rakhe ïa ka Azadi ka Amrit Mahotsav kum ka dak jong ka jingdap 75 snem ka jingïoh jinglaitluid, ka tnat AYUSH ka la sdang ïa ka jingñiew ïa ki 100 sngi kaba la sdang ha ka 13.03.2022 ha kaba la don ka jingïashim bynta 100 tylli ki kynhun.
Ha kane ka bynta, ka tnat AYUSH ka la buh ïa ki tarik kyrpang ïa ki tnat Sorkar Pdeng ba kin ïashim bynta ha ka jingniew ïa ki sngi shuwa ka International Day of Yoga da kaba pynlong ïa ki prokram leh yoga ba buh nongrim ha ki Common Yoga Protocol (CYP) bad ruh ban pynlong ïa ki prokram bapher bapher.
