Pynlong “Health Camp’ ka IRCS-MSB na ka bynta ki nong Manipur kiba wan phet sha ka jylla

Shillong, Naitung: Ka Meghalaya State Branch jong ka Indian Red Cross Society, ha ka 11 tarik mynta u bnai ha ryngkat ka jingïatreilang bad ka Jaiaw Presbyterian Church ki la pynlong ïa ka prokram aijingsumar ne ‘Health Camp’ na ka bynta kito ki briew kiba la phet sakma na Manipur hapoh ka ïingmane jong ki Kuki ha Lum Ba Tngen, Shillong.
Kane ka sienjam ba la shim na ka bynta ban pynlong ïa kane ka Health Camp ka la wan lyngba u Rev. W. C. Khongwir jong ka Balang Jaiaw Presby terian bad ruh na ki Life Member jong ka Indian Red Cross Society, Meghalaya State Branch.
Ki doktor kiba la wan ïashim bynta da ka mon sngewbha ha kane ka prokram ki kynthup ïa i Dr.TWahlang DHS ba la shongthait na ka Balang Presbyterian Jaiaw abd I Dr.Challiensung, ICI Madanriting.ïa kine la ïarap lang ruh da ki arngut kiwei pat ki nos kiba la shongthait kiba kynthup ïa i Kong HunmonKharbuli bad i Kong DilIangrai nalor ki arngut ki dkhot jong ka Red Cross hapoh ka jingïalang u GeneralSecretary u Bah Andrew Sawian.
La plie ïa kane ka Camp da ka jingkren pdiang sngewbha na u Kipgen uba dei u Chairman jong ka Balang Kuki Church.Kiwei pat kiba la ïa don lang nalor u Rev. Khongwir, ki kynthup ïa u Chairman jong ka Indian Red Cross Society Meghalaya State Branch, u Bah R. O. Wallang, ki pastor jong ka Balang, u Rev Chongloi na ka balang Kuki Church bad kiwei kiwei.
Haduh kumba shispah ngut na kine ki briew kiba wan phet na Manipur ki la ïoh ïa ka lad jingïarap lyngba kane ka prokram aijingsumar, kata kynthup naduh kiba la san bad kiba dang khynnah kumjuh.
Katba na ka liang ka tnat ka koit ka khiah ka sorkar Meghalaya ka la aijingïarap ha kaba ïadei bad ki dawai dashin, na ka liang ka Red Cross ka la aijingïarap ha kaba ïadei bad ki blanket, ki tiar shet tiar tiew, u khaw, phan, umphniang, u piat bad kiwei pat ki jingdonkam.Nalor kata kiwei pat ruh ki kynhun seng bapher bapher ki la ai ïa ki jingïarap kiba donkam na ka bynta jong ki.
Na ka liang u General Secretary ka IRCS Meghalaya State Branch lyngba une u kyrwoh u pynpaw ruh ba bun na kito kiba la wan phet sha kane ka jylla ki la duh noh ïa baroh ki jingdon jingem ki jong ki, kata kynthup ïa ki ïing ki sem bad kim don ei ei shuh lada kin leitphai pat sha la ka jong ka jaka.Kumta ruh ki don ïa ka hok ban ïoh ïa ka jingsngew synei lem da kaba pdiang sngewbha bad aijingïarap na ka bynta jong ki.
Ka jingkhublei kaba kyrpang ka leit ruh sha ka Dorbar Shnong jong ka Lum Ba Tngen halor ka jingpynbit pynbiang ïa ki jingdonkam baroh.