Shillong, ïaïong : Ka NSS bad NCC unit Umiam ki la pynlong ïa ka prokram ai snam mon sngewbha (Voluntary Blood donation Camp), ha ka ba la wan ïashim bynta da palat spah ngut ki samla pule ka Union Christian College Umiam-Khwan, kata kynthup ïa ki shynrang bad kynthei.
Na kine haduh 68 ngut ki la ïoh ban ai snam ha kane ka camp.ïa kane ka camp la pynlong ryngkat ka jingïatrei lang bad ka Meghalaya Aids Control Society & State Blood Transfusion Council Government of Meghalaya ha ka 29 tarik Lber 2022, hapoh ka College Auditorium.
Ka Regional Blood Bank Pasteur Institute Shillong bad kaNEIGHRIMS Hospital, Shillong ki long ki artylli ki Blood bank unit ki ba la ïoh sngewbha ïa ka snam ha kane ka Blood Donation Camp. Nalor kata la ïoh ruh ïa ka jingai jinghikai na I Dr. Lutika N. Lyngdoh Senior Medical Officcer NEIGHRIMS bad I Kong Ariba Laloo na ka Meghalaya Aids Control Society.
Kine ki blood bank unit ki la pynpaw ka jingsngewkmen ba ki la ïoh ka jingmyntoi na kane ka camp bad ki la pynpaw ruh ka jingsngewnguh bad ai khublei ïa ki nong pynïaid ka College ki ba la khot sngewbha ïa ki sha kane ka camp.
La pynïaid ïa kane ka voluntary blood donation camp da ki Programme Officer ka NSS ryngkat ka jingïatrei lang bad ka NCC unit.Ki la pynbna ruh ba kum kine ki jait prokram yn sa ïaleh ban pynlong na ka por sha ka por na ka bynta ban ïarap ïa kiwei pat ki Hospital bad ki Blood Bank unit hapoh Meghalaya.
