Pynlong awareness prokram ka ophis DSW-EJHD ha KB Memorial bad ialap halor ka jingshyrkhei u drok
Khliehriat, Jylliew 24 : Ka ophis jong ka District Social Welfare East Jaiñtia Hills District, hynnin ka sngi saitjaiñ ka la pynlong ïa ka awareness prokram ha ka skul K.B.Memorial Higher Secondary School, Wapungskur, ha kaba la ïalap bad pynshai halor ka jingshyrkhei u drok.
Kane ka jingpynlong prkram ka long ruh kum ka jingrakhe ïa ka sngi kyrpang ba pyrshah ïa u drok ka ‘International Day Against Drugs bad ruh kum shibynta jong ka Nasha Mukt Bharat Abhiyaan, ha kane ka prokram la ïa don ryngkat lang ka District Social Welfare Officer East Jaiñtia Hills District, ka kong R.Pasah, u Head Master jong ka skul K.B.Memorial Higher Secondary School, u bah Heipor Bang, ki khynnah skul bad kiwei kiwei ki riew rangbah.
Ha kane ka sngi ka tnat Social Welfareka la ioh ruh ban pynlong ïa ka jingiakop thoh Solagan bad la sam ïa ki prize sha kito ki khynnah kiba jop, kumjuh ruh la ioh ïa ka jingialehkai skit kaba lyngkot na ka tnat Child Line kaba pyni ïa ka jingshah ktah ka long iïng ha u drok ha kaba ka khynnah pule kam shym la lah shuh ban leh bha ha ka jingpule na ka daw ka jingdih drok hynrei da ka jingieid jong jong ka kmie la lah ban pynwandur pat ïa ka longbriew man briew jong ka
Ki Slaogan ba la thoh ki dei shaphang ka jingshyrkhei u drok u ba ktah ym tang ïa kito ki longiïng longsem kiba shah ktah hynrei uba ktah ruh ïa ka im lang ka sahlang hi baroh kawei.
Na ka liang ka kong R.Pasah ka la ai khublei ïa u babu Heipor Bang, ïa ki nonghikai, ki khynnah skul bad kumjuh ruh ka kynhun na ka Child Line, kiba la ai ïa ka skit kaba kit jingmut bad kaba ai ka jinghikai, ka ai khublei ruh ïa ka kynhun kaba na ka MACWA kaba la wan ban ïa snoh kti lang ha kane ka prokram bad baroh ki nongtrei kiba la ïa don bynta lang ha kaba kum kane ka prokram.
La ioh ruh ïa ka jingkren na u bah H.Bang, na ka MACWA bad kiwei kiwei, kiba la ai jingkren halor ka jingshyrkhei u drok bad kyntu ïa ki khynnah ba ki dei ban kiar na u drok abd ban ong Em ïa u drok, ha kajuh ka por ki la kyntu ba ki dei ban long ki khynnah kiba skem jingmut, ki ba khlaiñ ka bor pyrkhat ban lait na u drok.