Jowai, Ïaïong 07: Shi bynta na ka jingrakhe ïa ka Golden Jubilee jong ka Amlarem Sub-Division, mynta ka sngi 7 tarik ka ophis Sub-Divisional Medical and Health Officer, Amlarem, ryngkat ka jingïatreilang bad ka Sub-Divisional Animal Husbandry & Veterinary Officer, Amlarem Sub- Division kila pynlong ïa ka Awareness Program Cum Health Camp haka Shnong Moosakhia WJHD.
Ïa kane ka prokram la pynïaid da ka kong A. Nongjngi (MLHP), katba ka kong Vevotolu Kezo, kaba dei ka Sub-Divisional Officer (Civil), Amlarem ka la long kum ka Kongsan bad plie paidbah ruh ïa kane ka prokram.
Haba ai jingkren kala ban jur ïa ka jingdonkam ban pynjan ïa ki jingshakri sorkar sha ki thaiñ nongkyndong lyngba kum kine ki prokram. Kala pynsngew la pynlong ïa ka Awareness Programme Cum Health Camp shi bynta na ka Golden Jubilee jong ka Amlarem Sub-Division ban pyni ïa ka jingangnud jong ka bor sorkar ban kyntiew ïa ka koit ka khiah bad ka bha ka miat jong ki paidbah.
Shuh shuh kala kren shaphang ki jingpang ki bym lah ban saphriang kum ka jingpang shini, ka jingpang bampong, ka jingpang ha ka jingmut jingpyrkhat bad ka jingpang klongsnam, da kaba ong palat 60 percent na ki jingïap ha India ki dei na ki jingpang bym lah ban saphriang.
Kala batai shaphang ka jingpang bampong kaba la nang kiew ha ka thaiñ shatei lammihngi hapoh ka ri, kumta ka la ban jur ïa ka jingdonkam ban sumar bad peit bniah ïa ka koit ka khiah lyngba ki jinghikai na ki prokram.
Kala ban jur shuh shuh ïa ka jingdonkam jong ka jingsumar ïa ki longkmie ba armet bad ki khun, da kaba pynpaw ba ka kmie kaba koit ba khiah ka long kaba donkam na ka bynta ka longïing kaba koit ba khiah bad ki pateng ban wan. Kala pynsngew ïa ka jingdonkam ka koit ka khiah jong ki longkmie bad ban ïarap ban pynduna ïa ka jingïap jong ki khyllung (IMR) bad ka jingïap jong ki longkmie (MMR).
La hikai ruh halor ka rukom ri jingri ha ki thaiñ nongkyndong bad ki lad jingïarap kiba lah ban ïoh na ki doktor mrad.
U Dr Arwin Khonglah, Sub-Divisional Medical and Health Officer ka Amlarem, haka jingkren ula pynpaw ïa ki jingthmu jong kane ka prokram, ban kyntiew ïa ka jingtip jong ki paidbah halor ka koit ka khiah bad ban ïoh ïa ki lad jingsumar.
Ka Dr. Fulfill Rymbai, ka Sub-Divisional Animal Husbandry & Veterinary Officer, Amlarem, ka la ban jur halor ka jingdonkam jong ka kam ri mrad na ka bynta ka kamai kajih bad ka la pyntip sha ki paidbah shaphang ka Vocational Training Centre kaba don ha Khliehtyrshi, ha kaba la ai jinghikai ban ri mrad khlem jingsiew. Ka la pynshlur ïa ki nongshong shnong kiba kwah ban shim kabu ïa ki prokram ai jinghikai bad ki skhim sorkar kiba lah ban ïoh lyngba ka tnad Veterinary.
U Dr. Damuthimi Lyngdoh, C&RD Block Development Officer, Amlarem, ula pynshlur ïa ki nongshong shnong ka thaiñ ba kin ïashim bynta shitrhem ha kum kine ki Awareness Programme bad ki Health Camp ula kyntu ban ïashim bynta shitrhem ha kum kine ki prokram kiba lah ban ïoh shibun ki jingmyntoi na ki tnad sorkar bapher bapher bad u la pynshlur ruh ïa ki nongshong shnong ka thaiñ ban pynrung kyrteng ïalade na ka bynta u AADHAAR ban ïoh jingmyntoi.
Ha kane ka prokram la ai jingsumar bad peitbniah ïa ki longkmie kiba armet ha shuwa ban kha khun bad kumjuh ïa ki khynnah da ka Child Specialist Dr. Bless Sutnga, ka jingleh test ïa ki jait jingpang ba bun jait da ka kynhun jong ka Jarain PHC, bad ka jingpynrung kyrteng haka Meghalaya Health Insurance Scheme (MHIS) ryngkat bad ka jingpynïasoh ïa u Aadhaar.
Na ka tnad Veterinary, la pynsngewthuh halor ki jingpang jong ki jingri jingdup da ka Dr. Fulfill Rymbai, Sub-Divisional Animal Husbandry & Veterinary Officer, Amlarem, bud sa ka Veterinary Health camp bad ka jingsam ïa ki dawai bad jingbam sniang sha ki nongïoh jingmyntoi.
Ha kane ka prokram la sam ruh ïa ki syrnot sha ki nongtrei ka tnad ka koit ka khiah bad ki Institution halor ka jingtrei shitom jong ki haki bynta bapher bapher, kynthup ïa ka jingai injek Immunization bad kiwei kiwei ki jingshakri ha ka koit ka khiah paidbah, kum shi bynta na ka jingrakhe ïa ka Golden Jubilee jong ka Sub-Division.
