Shillong, Ïaïong 07: Ka Umphyrnai SC kala wanphai da ka nam jop ha ka lympung ïalehkai First Division Football League ba pynïaid da ka Shillong Sports Association (SSA).
Ka Umphyrnai SC kaba rem noh ha ka jingïakhun ba lah dep kala lah ban pynliem noh ïa ka Smit SC da 3-0 kol ha ka jingïalehkai ha ka sngi Palei ha madan MFA, Polo, Shillong.
Haba phai sha ka jingïalehkai ha kane ka sngi, ka Umphyrnai SC kala ïakhun tyngeh naduh kaba sdang bad tang katto katne minit kala ïoh ban thep kol, kane kala wan lyngba u Damanglang Kharbyngar uba la thep ha ka minit ba 9. Watla ka Umphyrnai SC kala ïoh ban thep shi kol hynrei ki rangïalehkai ka Smit ruh ki khlem ailad satia ha kaba kila ïakhun tyngeh bad pyrshang ban pynïakhaid hynrei haduh kaba kut jong ka kylla step ka Umphyrnai ka dang lamkhmat da 1-0.
Haba wanphai sha ka jingïalehkai jong ka kylla miet hadien ka jingïashongthait, ka jingïalehkai kala nang itynnad da ka jingïatrei shitom na baroh arliang ki kynhun. Ka jingïalehkai ka long kaba mar ïabiang bor bha ha ki minit ba la sdang biang ka kylla miet, hynrei ka jingïapashat bol kaba itynnad bha u Armanki Kharkongor u la thep ïa ka kol kaba ar na bynta ka Umphyrnai ha ka minit ba 53.
Lyngba kine ki ar kol kala nang pynskhem ïa ka kynhun kaba khlem ailad satia ïa ki jingpyrshang thep kol ki rangïalehkai ka Smit. Hapdeng ka jingïaid jong ki minit ka jingïapyni bor jong ki ar tylli ki team kala nang ïathnem bad kiba bun ki kabu kila pynlehnoh ei.
Watla ki rangïalehkai ka Smit kila pyrshang da ki buit bad ki sap ba ki don da ka thong ban pynphai kylla ïa kitei ki ar kol, pynban ki ar kol kala pynskhem ïa ki rangïalehkai ka Umphyrnai bad kim shym la hun tang da kine ki ar kol pynban kala ïoh ban pynkhih biang sa shisien ïa ka jar.
U Vicky Sharma u la ïoh ban thep ïa kol kaba lai na bynta ka Umphyrnai SC ha ka minit ba 67 ha kaba ka kynhun kala khur syndon ïa ka nam jop bad khur ïa ki lai point.
Lyngba kane ka nam jop ka Umphyrnai SC kala kamai saw point na ki laisien ïakhun da kaba jop shisien ïakhaid shisien bad rem shisien katba ka Smit haduh mynta kam pat khur jingjop shisien ruh na ki laisien mih madan.
Ka jingïalehkai mynta ka sngi Thohdieng (08-04-2022) kan long hapdeng ka Nongrim Hills SC pyrshah ïa ka Lawsohtun SC bad ka jingïakhun kan long ha ka por 3:30 baje janmiet ha madan MFA, Polo, Shillong.
