Pynliem kput ka Meghalaya ïa ka Sikkim ha kaba sdang jong ka NEOG 2022

Shillong, Naiwieng 07 : Ka kynhun ki rangïalehkai phutbol ka Meghalaya ka la sdang ka jingïaid lynti jong ka ha ka lympung ïalehkai kynjat bol jong ka 2nd North East Olympic Games da kaba pynliem kput da 6-1 kol pyrshah ïa ka Sikkim ha ka kyrdan ïalehkai ki U-21 na ka jingïalehkai na ka Group 2 hynne ka sngi Nyngkong ha madan MFA, Third Ground, Polo, Shillong.
U Dajiedlang Wanshnong u la khyrwit Hat-trick (23, 32, 53 min) na bynta ka Meghalaya, katba u Wadajied Kynsai Ryngkhlem uba mih madan kum u rangïalehkai shongben u la thep ar kol (90+3, 90+4 min) bad u Oresterwell Langshiang (90+5 min) u la ïarap thep shi kol ha kaba ka Meghalaya kaba dei ka nongpdiang pynlong ïa kane ka lympung ka la thep lai kol ha ka jingïalehkai ba la jan kut ar tad. Ïa ka shi kol na bynta ka Sikkim la thep da u Swarneem Gurung ha ka minit ba 66.
Watla ka 2nd NEOG 2022 yn plie pura ïa ka ha ka sngi Palei, hynrei ka jingïalehkai phutbol ka la nang ïaid shakhmat khnang ba ki nongïalehkai kin ïoh ban shong jahthait.
Ka Nagaland ka la pynliem da 2-0 kol ïa ka Arunachal Pradesh bad ka Manipur da 3-0 kol ïa ka Assam ha ka jingïalehkai hynne ka sngi Nyngkong. Ka Meghalaya bad Sikkim ki la ïakhun sdang ha kane ka lympung ha ka madan ba pynïeng thymmai da ki jingshai ha MFA Turf ïa kaba la buh khnang na bynta katei ka jingïalehkai.
Ki player ki la ïoh ruh ka kabu ban ïakynduh ïa u rangïalehkai phutbol bar ri barim jong ka ri India u Bah Eugeneson Lyngdoh uba dei mynta u MLA ka Mawphlang Constituency shwa hashwa ban sdang ka jingïalehkai bad kumjuh ruh u Myntri Rangbah ka Jylla u Conrad K Sangma, uba la sam ruh ka khusnam Man of the Match sha u Wanshnong uba la lah ban pynpaw ka sap ïalehkai kaba itynnad.
Ka Sikkim ka la ïakhun tyngeh ha kaba sdang jong ka jingïalehkai na ka jingshah thep kol ha ka Meghalaya ha kaba u Figo Syndai u la ïoh ban khyrwit nyngkong ha ka minit ba 23, pynban u Sushil Limboo u rangap kol ka Sikkim u la ïoh ban kyrda noh. Ka Meghalaya ka la ïoh biang sa shisien lyngba u Figo hynrei ka bol ka la tam noh na u dieng kol.
Shwa ban kut ka kylla step, u Gurung u la ïoh ka kabu kaba biang bha hynrei u Banshanskhem Kharsyntiew u la ïoh ba kem noh ïa ka bol.
Ha ka kylla miet, u Dajiedlang Wanshnong u la ïoh ban plie pyrda na bynta ka Meghalaya bad thep ruh ïa ka hat-trick shwa ba u Gurung un thep shi kol na bynta ka Sikkim, kaba la pynlong ïa ki paid nngkyrshan ban kynhoi risa na ki jaka shong.
Ka jingïalehkai la i ba kan kut noh da 3-1, pynban ka Meghalaya kaba la ïakhun tyngeh ka dang ïoh ban pynphai pat sa haduh lai kol ha ki minit ai tam, kata u Ryngkhlem u thep ar kol bad u Langshiang u la mih kum u substitute u la thep shi kol ha kaba ka Meghalaya ka la pynliem suk da 6-1 kol.
Ha ka sngi ba ar ka jingïalehkai kan long hapdeng ki kynthei U-17 ha kaba ka Manipur kan aireng pyrshah ïa ka Assam ha ka por 11 baje mynstep na ka Group 1 bud pat ka Mizoram pyrshah ïa ka Meghalaya ha ka por 3:30 baje janmiet na ka Group 2.