Pynliem kput ka Donkins ïa ka Khalsa Warriors da 200 ron ha ka SCA Cricket League 1st Division 2025

SHILLONG, Kyllalyngkot 05: Ka Donkins CC ka la pynjemkhnap ïa ka Khalsa Warriors da ka jingjop kaba shyrkhei haduh 200 ron ha kawei na ki jingïalehkai ka lympung Shillong Cricket League 1st Division 2025 ba la pynlong da ka Shillong Cricket Association hynne ka sngi Nyngkong ha madan Polo.
U Rohit Rai u la long u namtam ha kane ka jingjop hadien ba u la lah ban lamkhmat ha ka tied bad kamai ïa ka spah ron, kaba la pynlong ruh ïa u ban ïoh khur ïa ka khusnam Player of the Match ynda la kut ka jingïalehkai.
Hadien ba jop ïa ka toss ka Donkins ka la kam trai ban tied nyngkong bad buh ïa ka thong kaba 271 ron ha ka jingduh noh 4 wiket haduh kaba kut jong ki 40 ober. U Rohit Rai u la tied 141 ron naki 114 bol, katba u Maksodul Chaudharu u la noh synñiang 32 ron naki 67 bol.
Ka la don ruh ka jingïalehkai ba kyrpang na u Kushaldeep, rangkawang bol jong ka Khalsa Warriors, uba la khur ïa 3 wiket marwei bad ailad tang 46 ron naki 8 ober shuwa ba ka kynhun kan mad ïa ka jingeh kaba ap ïa ki ha ka pali tied.
Ka jinglah ki rangkawang bol jong ka Donkins CC ban nym ailad ban kamai ron bad weng ïa ki wiket uwei hadien uwei pat ka la pynlong ïa ka Khalsa Warriors ba kan long ban kamai tang 71 ron naba khyllem baroh 10 wiket haki 22 ober.
Ki rangkawang bol ba pawkhmat jong ka Donkins CC ha kane ka jingïalehkai ki long u Marcus Bhujel (khur 3/17 naki 4 ober) bad u Bhuwan Thapa (khur 2/9 naki 4 ober), hynrei ïa ka nam Player of the Match la khur da u Rohit Rai, na ka bynta ka 141 ron kaba u la kamai ha ka pali tied.