Nongstoiñ, Naitung, 6: Na ka bynta jong ka jingdap shi spah snem jong ka H.Gordon Robert Hospital kaba don ha Shillong, kaba la seng da u sahep H.Gordon Robert u Missionary na Ri Bilat ha u snem 1922, ka KJP Synod Sepngi ka la sdang ïa ka jingrakhe ïa ka Platinum Jubili naduh ki bnai kiba la dep bad kan pynkut noh ïa katei ka Jubili ha u bnai Naiwieng mynta u snem.
Kumta na ka bynta ban nang pynbha shuh shuh ïa ka Hospital bad ban nang pynkhlaiñ ïa ka jingshakri ïa ki paitbah, ka Jingiaseng Iasyllok ki Pastor jong ka KJP Synod Sepngi, ka la pynbeit ban pynmih pisa na ka bynta katei ka Hospital, da kaba pynlong ïa ka jingïalehkai phutbol paralok haman la baroh ki District kiba hap hapoh ka KJP Synod Sepngi ba kynthup ïa ka East Khasi Hills, West Khasi Hills, South West Khasi Hills bad Eastern West Khasi Hills.
Ka jingialehkai kan long beit hapdeng ki Pastor bad ki Ophisar sorkar, ha kaba ka Jingïaseng iasyllok ki Pastor ka la phiah ruh ha la ki jong ki jong ki zone, ha kaba ka Nongstoiñ zone ka dei kaba kaba la sdang nyngkong ïa ka jingïalehkai paralok mynta ka sngi ka 6 tarik Naitung. Kumban pynkynmaw ba ha ka Nongstoiñ zone ki don phra tylli ki Presbytery ka Laitkseh, Nongkhlaw, Nongstoiñ, Umsaw, Nongpyndeng, Rambrai, Ri Lyngngam bad ka Tynghor Presbytery.
Nalor katei ka jingïalehkai, ka Jingiaseng ïasyllok jong ki Pastor ka la pynlong ruh ïa ka Free medical checkup bad sam dawai ei naduh mynstep, ha kaba ki longkmie bad ki khynnah ki la ïatuid ban shim dawai na ki Doctor kiba la wan naduh Shillong ha madan New Nongstoiñ.
Ha ka jingïalehkai paralok baroh ki Pastor na ki phra tylli ki Presbytery ki la ïapoi bad ki la ïashim bynta ruh ha ka jingïalehkai bad na ka liang ki ophisar sorkar la ïashim bynta lut naduh ki Doktor, ki heh pulit ha kaba u bah P.D.Sangma Deputy Commissioner ka West Khasi Hills u la long u kapten u ba ïalam ïa ka kynhuh ïalehkai jong ki ophisar.
Ha shuwa ban sdang ïa ka jingïalehkai, la pynlong ïa ka jingïalang ha kaba la duwai da u Pastor J.L.Mawlong bad la ïoh ïa ka jingpynshai halor ka jingthmu jong katei ka jing pynlong ïa ka jingïalehakai phutbol paralok da u Rev I.W. Nongsiej. Ha kajuh ka por la ïoh ruh ïa ka jingpynshai na u Dr .R.Nongrum Medical Superintendent jong ka H.Gordon Robert Hospital.
U Dr.Nongrum haba ai jingkren ha katei ka sngi u la ong ba ka Robert Hospital ka dang don kam shibun bah ki jingïarap ha ka ban pynbit pynbiang ha kiba bun ki bynta, khnang ba ki paitbah kin ïoh ïa ka jingsumar kaba paka ha baroh ki jait jingshitom.
Nalor kata shuwa ban sdang ïa ka jingïalehkai la ïoh ïa ka jingkren na u bah Macmilan Byrsat MLA ka Nongstoiñ u ba la shah khot kum u kongsan. Utei u nongmihkmat haba ai jingkren, u la ong ba ka Robert Hospital ka dei ka jaka sumar kaba baroh ki paitbah ka jylla ki phai khmat sha ka. Ka dei ruh ka Hospital kaba la ai ka jingshakri kaba bha tam ïa ki paitbah ym tang napoh ka jylla, hynrei wat kiba na shabar ka jylla ruh ki la ïoh shibun ki jingmyntoi na ka jingshah sumar ha katei ka Hospital.
Ha katei ka jingïalehkai paralok hapdeng ki Pastor bad ki Ophisar sorkar, ka kynhun ki Ophisar ka la khur ïa ka nam jop ha kaba ka la pynliem ïa ka kynhun ki Pastor da 3 kol la 1. Hadien ka jingialehkai, la sam ïa ki khusnam sha ki Pastor bad ki Ophisar da u kongsan bad kiwei kiwei.
