SHILLONG, Kyllalyngkot 04: Ka kynhun ïalehkai kriket jong ka Winds ka la lah ban pynliem noh da 9 wiket ïa ka Metallica CC ha kawei na ki jingïalehkai jong ka lympung Shillong Cricket League 1st Division 2025 ba la pynlong da ka Shillong Cricket Association.
Ka Metallica CC ka la kam trai ban tied nyngkong hadien ba jop ïa ka jingkynting pisa (toss) hynrei ka la shah pynkut noh da tang 110 ron haki 32.1 ober. Kiba la lamkhmat ha ka tied ki long u Imran Ali (22 ron naki 59 bol) bad u Rahul Biswa (16 ron naki 36 bol).
Napdeng ki rangkawang bol jong ka Winds, u Kenny Wann u la khur 3/13 naki 8 ober, katba u Bikash Mahato u la khur 2/18 naki 6 ober. Nangta haba beh ïa ka thong ka Winds ka la kamai 115 ron bad duh tang shi (1) wiket haki 16.4 ober.
U Sameer Choudhary (42 ron naki 49 bol) bad u Dipanju T Lama (43 ron naki 15 bol) kidei ki nongïalehkai kiba la noh synñiang bun shah na ka bynta ka Winds ha ka tied ban pynthikna ïa ka jingjop da 9 wiket hynrei ïa ka nam Player of the Match la khur da u Kenny Wann (da kaba khur 3/13 naki 8 ober).
