Nongpoh, Jylliew 19: Ka kynhun ïalehkai jong ka Umsaw Nongbri Dong Mawsiang kala rah syndon ïaka nam lahduh hadien ba kala lah ban pynliem noh ïaka Kbet Dong Shaid Shaid da 2-0 haka phainal jong ka lympung ïalehkai phutbol bala pynlong da ka Umsaw Nongbri Youth Club Cum Library Committee ha madan ïalehkai ka shnong Umsaw Nongbri.
Ïa katei ka lympung la wan ban pynhp pyrda noh da u Bah Jayson Lennox Nongrum President ka HYC Ri-Bhoi District kum u kongsan haka jingdonlang u Tbn DR Mawphniang kum u symbud kongsan, ki nongïalam ka Youth Club ba kynthup ïa u Samla Mission Tron President, Bah PS Nongrum Chairman ka Sports Committee jong ka RBDCA bad kiwei kiwei ki riew rangbah.
Haba phai sha ka jingïakhun phainal ha katei ka sngi hapdeng ka Umsaw Dong Mawsiang pyrshah ïaka Kbet Umshaid shaid ka jingïaleh kala long kaba ïakhaid bad itynnad bha kaba la pynshongshit ïaki paidbah nongpeitkai bad ki nongkyrshan jong ki 2 kynhun, hynrei hapdeng ka jingïakhun ba jur ka Umsaw Nongbri kala ioh ban pynkhih nyngkong ïaka jar jong ka kylla step bad tam ïaka Kbet da 1-0.
Katba haka kylla miet ka jingïakhun kala nang kham shongshit bad kham itynnad shuh shuh namar ka jingïakhun tyngeh ba mar kylliang ban rah ïaka nam lahduh bad watla ki rangïalehkai jong ka Kbet kila ïakhun dohiap ban pynphai ïa katei ka shi kol, hynrei da ka jingtbit ki rangïalehkai ka Umsaw kim shym la ailad satia ba kan ioh pynphai hynrei kila ioh biang sa kawei ka kabu ban pynkhih ïaka jar haka kylla miet ban rah syndon ïaka nam lahduh jong katei ka lympung da 2-0.
Hadien ka bala pynkut ïaka jingïalehkai naka liang ka kynhun nongpynïaid jong Umsaw Nongbri Youth Club cum Library Committee kala sam ruh ïaki khusnam ha katei ka sngi da ka song pisa bad ki trophy.
