Pynliem ka Sputnik da 44 ron ïa ka Nongmynsong CC ha ka SCA Cricket League Super Division 2026

SHILLONG, Lber 02: Ka Sputnik ka la khur ïa ka jingjop ha ka lympung Shillong Cricket League Super Division 2026 jong ka Shillong Cricket Association, hadien ba ka la pynliem noh da 44 ron ïa ka Nongmynsong Cricket Club hynne ka sngi Nyngkong.
Hadien ba ka la shah pynkhamti ban tied nyngkong, ka Sputnik ka la kamai 298 ron bad khyllem 7 wiket haki 45 ober, bad u Swarajeet Das u la long u nongtied ba kongsan tam da kaba kamai 142 ron naki 129 bol, katba u Amiangshu u la ïarap 80 ron naki 82 bol.
Na ka liang ki nongkawang bol jong ka Nongmynsong, u Santhosh PM (9 ober; ailad 43 ron) bad u Anish Charak (9 ober; ailad 48 ron) ki la ïoh ban khur mar 2 wiket.
Hynrei haba beh ïa ka thong, ka Nongmynsong ka la pynkut ïa ka pali tied da kaba kamai 254/7 haki 45 ober, ha kaba u Abhisek Gupta (55 ron naki 73 bol) bad u Pushkar Raj (38 ron naki 26 bol) kidei ki nongtied ba seisoh tam watla kim shym la lah ban ïalam ïa ka kynhun sha ka jingjop.
U Arbin Singh u la pyndep ïa ka pali bol da kaba khur 3/43 naki 8 ober, katba u Avinav Choudhury u la khur 2/31 naki 9 ober. Na ka bynta ka spah ron ba u la noh synñiang ha ka por tied, u Swarajeet Das u la ïoh ban khur ïa ka khusnam Player of the Match.