Shillong, Ïaïong 04: Ki 6 wicket ai kamai 14 ron na u Arbin Singh, ka Simsang Sharks kala khur jingjop da kaba pynliem da 51 ron pyrshah ïa ka Symper Panthers ha ka lympung ïalehkai Senior Men Challengers Cup ba pynïaid da ka Meghalaya Cricket Association ha ka jingïalehkai ha ka sngi Nyngkong ha madan Polo, Shillong.
Ïa ka jingïalehkai hapdeng kine ki ar tylli ki team la pynduna noh sha ka 20 over shilliang hadien ba la ailad biang u slap bad ba la sdang ïa ka jingïalehkai haduh ka 2 baje janmiet. Ka kynhun ïalehkai jong ka Simsang Sharks kaba la jop ïa ka jingkynting pisa kala kam trai ban tied nyngkong bad ka kamai 144 ron duh noh 4 wicke, katba ka Symper Panthers kam lah ban kynjoh sha ka thong bad kamai tang 93 (all out).
Haba tied nyngkong ka Simsang kala lah ban kamai ron bad duh noh tang shi wicket hadien ba kala kamai 61 ron ha ki 10 over, shwa ba u Mark Ingty, Yogesh Tiwari bad u Akash K Choudhury kila shah pynkhyllem wicket noh.
U Tiwari u kamai bun ron da 30 ron na ki 23 bol da kaba khyrwit ar tylli ki four bad kawei ka six ron, katba u Ingty u rangïalehkai ba la kham ïaw uba la wanphai sha ka pali tied u kamai 29 ron na ki 13 bol da kaba khyrwit lai tylli ki four bad ar tylli ki six ron. U Bonkam Marak u kamai 21 ron bad u Amiangshu Sen 26 ron (not out) bad u Choudhury 19 ron (not out) kaba la pynlong ïa ka kynhun ban kynjoh sha ka 144 ron.
U Kishan Lyngdoh uba dei ruh u kapten jong ka Symper u ïoh 1 wicket ai kamai 12 ron, u Himan Phukan (1/18), Bijon Dey (1/22) bad u Prolin Phanjom (1/31) kiba dei sa ki lai ngut kiba la khur wicket.
Ka Panthers ruh kala lah ban ïalehkai bha ha ka liang ka pali tied ha kaba ka kamai 42 ron bad duh noh tang 1 wicket ha ki san over, bad ka donkam da hynñiew ron ha ka shi over. U Kishan u la lamkhmat ïa ka kynhun da kaba kamai 28 ron na ki 19 bol da kaba khyrwit saw tylli ki four bad kawei ka six ron.
Hynrei kane ka jingkamai ron kam shym la neh slem ha kaba ki wicket kila shah pynkhyllem noh ha ka kti jong u Arbin bad ka jingkhmih lynti jong ka Symper kala poi noh sha kaba kut. U Arin Singh marwei u khur 6 wicket ai kamai 14 ron kaba dei ka jingïoh khur wicket kaba bun tam ha kane ka tournament, bad ka kaba ar kadei jong u Aryan Bora uba khur 6 ai kamai 15 ron na bynta ka Myntdu Lions ha ka jingïalehkai ha ka sngi U Blei.
Nalor u Kishan, tang u Tarique Siddique uba la kamai 27 ron (not out) bad ka kynhun kala shah pynkhyllem lut baroh ki wicket bad kamai tang 93 ron, kaba dei ka jingkamai duna ron tam ha kane ka tournament. Kiwei pat kiba la ïarap khur wicket na bynta ka Simsang ki kynthup ïa u Shaisngi Lyngdoh (1/14), Sanvert B Kurkalang (1/17) bad u Choudhury (1/17).
Ha kane ka jingïakhun kam don ka team kaba kynjoh sha ka kydan ba hakhlieh hadien ba baroh ar kine ki team kila mad ka nam rem ha ar tylli ki jingïalehkai bad la duh jingkyrmen ruh ban rung sha ka final. Hynrei ka Simsang kan hap ban ïakhun tyngeh ban pynthikna don ha ka kyrrdan ba kham shalor.
Ka Symper kan mih madan biang mynta ka sngi Ba-ar bad kan ïakhun pyrshah ïa ka Umiam Eagles ha ka por 9 baje mynstep.
