Shillong, ïaïong 15: Ka kynhun ïalehkai kriket jong ka Shillong Cricket Academy ka la khur jingjop ha ka jingïakhun kaba ar jong ka ha ka 10th Sitaram Chhawchharia Memorial U-19 Cricket Meet kaba la long ha Guwahati ha ka sngi Hatmajai.
Ka jingïakhun ka la long pyrshah ïa ka Goalpara Cricket Academy, ha kaba ka Shillong CA ka la jop da hynriew wiket bad pynsah sa 6.3 ober ha kti. ïa kane ka lympung lehkai la pynïaid da ka Bud Cricket Club ha madan NFRSA Cricket Ground ha Maligaon kaba ha Guwahati.
Kumban shu pynkynmaw, ka Shillong CA ka la mad ïa ka jingshah rem ha ka jingïalehkai kaba nyngkong ha ka Mangaldai Cricket Academy ha ka sngi Nyngkong.
Haba phai sha ka jingïalehkai kaba la long ha ka sngi Ba ar, ka Goalpara CA ka la jop ïa ka jingkynting pisa (toss), bad ka la jied ban tied nyngkong hynrei ka la shah pynkhyllem lut baroh shiphew wiket na bynta 239 haki 49.5 ober. U Asjad u la lamkhmat ha ka tied da kaba kamai 73 ron naki 98 bol shuwa ba un long uwei pat u wiket ban shah pynkhyllem ha ka kti jong u Ashish Kumar Lohar uba la seisoh bha ha ka bol. U Ashish u la long uba kongsan tam ha ka bol da kaba khur 6/25 naki 9.5 ober, katba u Shushant Das u la khur 2/41 naki 10 ober. U Angkit Tamang (khur 1/30 naki 9) bad u Mewankitbok Kharpuri (khur 1/37 naki 6) ki long kiwei pat kiba la ïoh ban pynhap wiket.
Haba beh ïa ka thong u Krishiv Chaudhary u la ïoh ban kamai 42 ron na ki 78 tylli ki bol bad ka la don ruh ka jingnoh synñiang na kiwei pat ki nongtied kiba hadien, ha kaba u Shubham Rasaily u la ïarap 30 ron na ka 50 bol bad u Aditya Singh u la kamai 49 ron na 40 bol. U Rudra Singh Rathore u la long uba kongsan tam ha ka tied na bynta ka Shillong CA da kaba kamai 64 ron naki 70 bol khlem da shah pynhap, kiba u la bynrap da san tylli ki fours.
Ha kaba kut u Ashish u la ïoh ban khur ïa ka khusnam Player of The Match.
