Shillong, Ïaïong 02: Ka RoundGlass Punjab kala khur ïa ki lai point hadien ba kala pynliem noh da 3-2 kol pyrshah ïa ka Sudeva Delhi ha ka jingïalehkai I-League 2021-22 ha ka sngi Saitjaiñ ha Kalyani Stadium, katba ka Real Kashmir bad ka Indian Arrows kila ïasdam mar shi point na ka jingïakhaid da kaba thep mar shi kol ha ka jingïalehkai ha Naihati Stadium.
Haba phai sha ka jingïalehkai hapdeng ka RoundGlass Punjab bad Sudeva Delhi, ka jingïakhun ka ïakhaid bad itynnad bha khamtam ha kaba ka RoundGlass kala shah thep ar kol ha ka kylla step hynrei kala lah pat ban wanphai thep kol ha ka jingïakhun jong ka kylla miet.
Ka Sudeva Delhi kala ïoh ban lamkhmat da 1-0 kol ha ka jingïalehkai ba dang ïaid san minit lyngba ka kol ba la thep da u Sreyas Valiyaveettu Gopalan bad lyngba kane ka shi kol ka kynhun kala nang pynkhlaiñ shuh shuh khlem da ailad thep kol ïa ka kynhun ïalehkai pyrshah.
Bad shwa ban kut ka jingïalehkai jong ka kylla step u Abhijit Sarkar u la thep ïa ka kol kaba ar na bynta ka kynhun Sudeva Delhi kaba la pynlong ïa ka kynhun ban lamkhmat da 2-0 kol haduh kaba kut jong ka kylla step.
Haba wanphai sha ka jingïakhun jong ka kylla miet, kala kylla syndon ha ka rukom ïalehkai, ha kaba ka RoundGlass Punjab kala ïoh ei ïa ka shi kol mar ba sdang ka jingïakhun kata ha ka minit ba 46 hadien ba u Vanlalzuidika Chhakchhuak u la kum thep bakla hapoh kol lajong.
Bad tang hadien katto katne bala ïaid biang ki minit ïalehkai ka RoundGlass kala ïoh ban lehkmen sa ïa ka shi kol pynïakhaid ba la thep da u Sumeet Pasi uba la thep ha ka minit ba 49. Lyngba kane ka jingïakhaid ka jingïalehkai kala nang ïathnem ha baroh arliang, hynrei ka RoundGlass kaba la ïoh mynsiem bha na kine ki ar kol kala nang ñion shakhmat ban thep kol.
Hapdeng ka jingïakhun kaba itynnad bha, ka RoundGlass sa shisien kala ïoh ei biang ïa ka shi kol hadien ba u Souvik Das u la kum thep bakla hapoh kol lajong ha ka minit ba 55 kaba la pynshadkhmen ïa ka kynhun RoundGlass bad nang ïoh mynsiem shuh shuh haduh kaba kut ka jingïalehkai.
Ha kawei pat ka jingïalehkai hapdeng ka Real Kashmir bad Indian Arrows, kine ki ar tylli ki team watla ka jingïakhun tyngeh hynrei ha kaba kut ki hap ban ïasam mar shi point hadien ba ki thep mar shi kol. Ïa ka shi kol na bynta ka Indian Arrows la thep da u Vibin Mohanan ha ka minit ba 77 bad u Park Jong-oh u la thep ïa ka kol pynïakhaid na bynta ka Real Kashmir ha ka minit ba 88.
