Nongpoh, Nailur 20: Hadien ka jingïaid shaphrang jong ka lympung ïalehkai phutbol, ka 22nd All India JWHWLAO Baliram Boro Gold Cup Football Championship 2022 bala pynlong da ka Harisinga AC/ABSU bad Harisinga Football Association, katei ka lympung kala poi noh sha kaba kut mynta ka sngi hadien ka jingïakhun phainal hapdeng ka Ri-Bhoi United FC pyrshah ïaka Harisinga FC ha madan ïalehkai Harisinga Rabi Kachari Mini Stadium, Udalgari Assam.
Katei ka jingïalehkai ha katei ka sngi kala long kaba sngewtynnad bad ïakhaid bha ha kaba ki rangïalehkai na baroh kynhun kila sei ïala ki jong ki sap ki phong ban ioh rah ïaka nam lahduh jong katei ka lympung, hynrei hapdeng ka jingïakhun kaba jur ka Ri-Bhoi United FC kala ioh ban pynkhih ïaka jar lyngba u Robert Khongjoh bad Fashioning Syngkli kaba la biang pura syndon ïaka kynhun Ri-Bhoi United ban rah ïaka nam lahduh jong katei ka lympung da 2-0 kol.
Lyngba katei ka jingjop ha katei ka sngi naka liang ka kynhun Ri-Bhoi United FC naduh ki bor pynïaid kila pynpaw ka jingsngewkmen halor katei ka namjop ha katei ka sngi, kaba long ka jingsarong kaba khraw ïaka dong Ri-Bhoi bad jylla baroh kawei bad kum ka kynhun kan dang bteng ruh ban shim bynta sha kiwei kiwei ki jingïakhun wat shabar jylla.
