Shillong, Rymphang 19: Kawei naki jingïalehkai jong ka Shillong Cricket League Super Division 2024-25 ba la pynïaid da ka Shillong Cricket Association [SCA] hynne ka sngi Balang ha madan Polo, ka la jam sha kaba kut ha kaba ka Rangkynsai CC ka la pynliem ïa ka NFU da 3 wiket.
U Ram Gurung u la long uba kongsan tam na bynta ka Rangkynsai, ha kaba u la kamai 67 ron ha ka por tied bad khur ruh 3 wiket ha ka bowling ban khur syndon ïa ka khusnam Man of The Match.
Ka jingïalehkai ka la sdang ha kaba ka NFU ka la shimti hi ban tied nyngkong hadien ba jop ïa ka toss, bad ka la lah ban kamai 191 ron haduh kaba kut jong ka 45 ober da kaba hap 6 wiket. U Shubham Rasaily (66 ron naki 119 bol) bad u Ayushman Das (46 ron naki 63 bol) kidei ki rangïalehkai ba kamai bun ron ha ka tied.
Na ka liang jong ki rangkawang bol, u Ram Gurung (9 over: shah tied 44 ron) bad u Ajay Duhan (9 over: shah tied 21 ron) ki la ïoh ban khur mar 3 wiket.
Hadien ba u la seisoh ha ka bol u Ram Gurung u la kyrshan borbah ruh ha ka tied da kaba kamai 67 ron naki 85 bol kaba la pynsuk ïa ka Rangkynsai ban kynjoh tam ïa ka thong, da kaba kamai 195 naki 44.3 ober bad khyllem 7 wiket. Uwei pat u nongtied ba kamai bun ron udei u Kishan Lyngdoh (35 ron naki 38 bol).
Na ka liang jong u Neetesh Sharma u la khur 3/31 naki 9 over, katba u Hasin u la khur 2/32 naki 9 over, hynrei kaba sngewsih ka long ba kim shym la lah ban khanglad ïa ka Rangkynsai ban kynjoh ïa ka thong ba ki la buh.
