SHILLONG, Rymphang 27: Ka jingïalehkai ba kyrpang na u Anish Charak, uba la khur hat trick ka la ïarap ïa ka Nongmensong CC ban pynliem noh ïa ka Nongthymmai SCC da 8 wiket ha ka jingïakhun ka lympung Shillong Cricket League Super Division 2026 ba la pynïaid da ka Shillong Cricket Association (SCA) hynne ka sngi Thohdieng, ha Polo.
Ka Nongmensong ka la lah ban pynkhyllem noh ïa baroh ki nongtied jong ka Nongthymmai SCC tang na ka bynta 38 ron haki 19.3 ober, ha kaba u Anish u la khur 5/3 naki 6 ober, katba u Raghav Magotra u la pyndep da ka jingkheiñ kaba 3/12 naki 5.3 ober.
Na ka liang jong ki nongtied ka Nongthymmai SCC, dei tang u Ranjit Kumar Rai (13 ron naki 24 bol) bad u Banialam Mylliemngap (13 ron naki 34 bol) kiba la lah ban kynjoh sha ka phew ron.
Ka la donkam tang 3.5 ober ïa ka Nongmensong ban pyndep ïa ka kamram, da kaba kynjoh 42 ron bad hap 2 wiket, ha kaba u Abhishek Gupta u la kamai 20 ron naki 10 bol, katba u Kush Agarwal u la noh synñiang 16 ron naki 10 bol.
Ki ar tylli ki wiket kiba la shah pynhap kidei kiba la khur da u Banialam Mylliemngap (1/7 naki 0.5 ober) bad u Gavineal Marpna (1/25 naki 2 ober).
Ha kaba kut u Anish Charak u la shah jied ban khur ïa ka khusnam Player of the Match.
