Pynliem ka Nongmensong ïa ka Langsning ha ka SCA Cricket League Super Division 2024-25

SHILLONG, Lber 24: Kawei ka jingïalehkai jong ka Shillong Cricket League Super Division 2024-25, ba la pynïaid da ka Shillong Cricket Association, hynne ka sngi Nyngkong ka la jam sha kaba kut ha kaba ka Nongmensong CC ka la pynliem ïa ka Langsning CC da 23 ron ban khur ïa ka jingjop.
Hadien ba jop ïa ka jingkynting pisa (toss) ka Langsning ka la aiti sha ka Nongmensong ba kan tied nyngkong, bad kane ka kynhun ka la lah ban kamai 171 ron shuwa ban khyllem baroh 10 wiket haki 37 ober. Kiba la pawkhmat ha ka tied ki long u Anish Charak (33 ron naki 57 bol) bad u Himan (32 ron naki 29 bol). U Shembhalang u la khur 3/26 naki 8 ober ha ka bowling.
Haba pyrshang ban jubab ïa ka thong ba la buh, ka Langsning kam shym la lah satia ban kynjoh namar ba la lap ba kut ki 40 ober ba la mang, ha kaba kane ka kynhun ka la ïohlad ban kamai duna da 148 ron, da kaba hap 9 wiket. Na ka liang jong u Zahir Alam u la kamai 45 ron naki 47 bol, nangta u Ibit Tabah u la kamai 30 ron naki 63 bol.
U Himan Phukan u la long uba seisoh tam ha ka bowling da kaba khur 4/21 naki 8 ober, kaba la ïarap ïa ka Nongmensong CC ban jop da 23 ron bad u la ïoh ruh ïa ka nam Player of The Match.