Shillong, Jymmang 15: Ka Meghalaya ka la long ka lahduh ba thymmai jong ka lympung ïalehkai kriket ki shynrang kaba la tip da ka NECDC Senior Men’s Interstate Friendship Tournament 2025 hadien ba ka la pynliem noh ïa ka Nagaland (kaba la jop arsien bad ka Jylla ba pynlong ïa kane ka lympung) da 110 ron ha ka jingïakhun ïa ka final jong ka sien pynlong kaba lai ïa kane ka lympung ha ka sngi Palei (15 tarik Jymmang, 2025).
Haba phai sha ka jingïalehkai, ka Meghalaya ka la jop ïa ka jingkynting pisa (toss) bad ka la kam trai ban tied nyngkong ha kane ka jingïakhun kaba la long ha Sovima Cricket Ground. Ka shiteng spah ron (half century) na u Arpit Bhatewara bad u Jaskirat Singh Sachdeva ka la pynlong ïa ka kynhun ban kynjoh sha ka 230/7 ha ki 50 ober katba ka Nagaland ka la mad ïa ka jingduh jong katto katne ngut ki wiket ba sdang hynrei ka la ïakhun tyngeh shuwa ba kan shah pynkhyllem baroh tang na bynta 120 ron ha ki 34.3 ober.
ïa kane ka lympung la pdiang ban pynlong da ka Nagaland Cricket Association hapoh ka jingpeit jong ka North East Cricket Development Council. Ka jingthmu jong kane ka lympung ka long shi bynta ban ïarap pynkhreh ïa ki jylla jong kane ka thaiñ shatei lammihngi na ka bynta ka samoi ïalehkai 2025-26 ki lympung kriket jong ka BCCI kaban sa wan. Ka Nagaland ka la jop ha ki ar wat ha ki sien pynlong ba la dep jong kane ka lympung katba ka Meghalaya kam pat ju ïohrung wat tang sha ka semifinal, watla ka jingbym ailad ka suiñbneng ka dei ka daw ha baroh arsien.
Ka jingïakhun kaba jop mynta ka kynti ka la wan hadien ka jingjop jong ka kynhun ïalehkai kriket ki kynthei jong ka Meghalaya ha u bnai ba la dep ha ka lympung ïalehkai 2nd NECDC Senior Women Tournament 2025, kaba la long ha Sikkim.
U Arpit u la khyrwit ïa ka shiteng spah ron (half-century) kaba lai ha kane ka lympung bad ka jingnoh synñiang kaba haduh 72 ron na ki 113 tylli ki bol ka dei ka ron kaba heh tam jong u haduh mynta. U la ïoh ïa ka jingkyrshan kaba thikna na u Swastic Chettri (43 ron na ki 83 bol) ban kamai 73 ron na bynta u wiket uba ar. Kine ki shijur ki la tei ïa ka thong jong ka kynhun da kaba jaijai, da kaba kamai tang khyndiat bad palat ïa ka 3 ron ha ka shi ober.
Hadien ka jingduh noh ïa u Swastic namar ka run out bad ka jinghap kloi jong u Lerry Sangma tang hadien kata khlem da kamai ron, u Arpit u la bynrap sa 92 ron ha ka jingïatreilang ryngkat bad u Jaskirat Singh Sachdeva (55 na ka 57), uba la sdang ban kyntiew ïa ka ron katba ka innings ka la jam sha ka bynta kaba kut. Ka jingnohsynñiang kaba stet jong u Akash K Choudhary (24 na ka 18) bad u Ram Gurung (16 khlem out na ki 10) ka la pynlong ïa ka Meghalaya ban buh ïa ka thong kaba jwat ïa ka liang pyrshah da 230/7.
Ka Meghalaya ka la dep ban pynliem teng ïa ka Nagaland ha ka jingïakhun plie jong kane ka lympung ha ka group stage hynrei katei ka jingïalehkai ka la shah pynthut namar u slap. Hynrei ha ka final kam shym la don kano kano ka jingpynthut na ki bor mariang.
U Abhishek Kumar u la pynkhyllem ïa lai ngut na ki saw ngut ki nongtied ba kongsan (un sa khur ruh ïa u wiket ba khatduh ban pynkut ïa ka sngi da 4/23 ha ki 7.3 ober) bad u Akash (2/14 ha ki 7 ober) u la pynhap sa uwei ban pynkordit ïa ka Nagaland da tang 17/4 ha ki 7.1 ober.
Na ka liang jong ka Nagaland kaba dei ka lahduh ba ïada ïa ka burom, ki la pyrshang ban tei biang ïa la ka jong ka jingïalehkai, ha kaba u Sedezhalie Rupero u la noh synñiang 23 ron bad u Imliwati Lemtur 27 ron hynrei nangne ka la dei ka pali jong ki nongkawang bol spin ban pynkordit ïa ki nongtied, ha kaba u Manish Sharma u la ïoh ban khur 3/31 ha ki 8 ober bad u Aryan Borah u la khur 1/22 naki 5 ober. U Chopise Hopongkyu u la pynslem katto katne por ïa ka jingïakhun shuwa ban kut da kaba kamai 28 ron hynrei u la ngat ha ka shrip jong u Akash kaba la pynkut ïa ka jingïalehkai.
Kiba la donlang ha kane ka sngi pynkut ki long u Myntri Rangbah ka Jylla Nagaland u Neiphiu Rio, uba dei ruh u Convener jong ka NECDC. U Co-Convener bad President jong ka Meghalaya Cricket Association u Nababrata Bhattacharjee, u MKJ Mazumdar dkhot jong ka Apex Council Member jong ka BCCI bad kiwei de ki dkhot nongkitkam jong ka NECDC.
