Pynliem ka Laitjem CC ïa ka Marbisu SC ka Hurdles CC ïa ka Cricket Lovers

Shillong, Jymmang 31: Ka lympung ïalehkai cricket jong ka East Khasi Hills Cicket Association (EKHCA) kaba la tip kum ka District League T20 Cricket Tournament 2022 ka dang ïaid shaphrang mynta bad ha ka sngi Ba-ar ki saw tylli ki kynhun kiba la mih madan ki kynthup ïa ka Laitjem CC, Marbisu CC, Hurdles CC bad ka Cricket Lovers. Ha kane ka jingïakhun, ka Laitjem CC ka la khur jingjop da kaba pynliem da 171 ron ïa ka Marbisu SC bad ka Hurdles CC da 7 ron ïa ka Cricket Lovers.
Ha ka jingïakhun kaba nyngkong la ïoh ban pynïalehkai hapdeng ka Marbisu bad Laitjem ha kaba ka Laitjem CC kaba la jop ïa ka jingkynting pisa ka la kam ban tied nyngkong bad ka la ïoh ban buh ïa ka thong kaba biang tam da kaba kamai 283 ron duh noh 5 wicket ha ki 20 over.
Ki rangtied ki la lah ban ïalehkai bha, u Poilang Thawmuit marwei u khyrwit 70 ron na ki 30 bol, u Mebanshan Kharsati u kamai 58 ron na ki 34 bol bad u Rokerben Kharpuli u kamai 54 ron na ki 30 bol. U Mansuk Kurbah u khur 2 wicket ai kamai 43 ron ha ki 4 over na bynta ka Marbisu SC.
Haba wan beh ïa ka pali tied, ka Marbisu CC ka khlem lah ban kamai ron ha kaba ka la hap noh 9 wicket da kaba kamai tang 112 ron ba baroh ki 20 over, bad dei tang u Mansuk Kurbah uba kamai bun ron da 35 ron na ki 32 bol katba u Arnold Shadap marwei u khur 4 wicket ai kamai 12 ron ha ki 4 over na bynta ka Laitjem CC. Ïa ka nam Player of the Match la ïoh da u Mebanshan Kharsati.
Ha ka jingïakhun kaba ar, ka Hurdles CC ka la kam ban tied nyngkong hadien ba ka la jop ïa ka jingkynting pisa bad ka kamai 138 ron duh noh 7 wicket ha ki 20 over, u Bamanbha Shangpliang u kamai 46 ron na ki 35 bol bad u Lanangshngain Kharbteng u kamai 35 ron na ki 36 ron katba u Mehraf Sarkar jong ka Cricket Lovers u khur 2 wicket ai kamai 13 ron ha ki 4 over.
Ka Cricket Lovers kam lah ban kynjoh sha ka thong haba wan beh ïa ka pali tied bad kamai 131 ron hap noh 10 wicket ha ki 19.5 over bad dei tang u Rohan Rai uba kamai bun ron da 31 ron na ki 25 bol, u Bamanbha Shangpliang u khur 3 wicket ai kamai 13 ron ha ki 3 over bad u Ricky Stone Nongbet bad u Dapmain Rani ki ïoh mar 2 wicket. Kumta ka Hurdles CC ka la jop da 7 ron bad ïa ka nam Player of the Match la ïoh da u Bamanbha Shangpliang.