COLOMBO, SRI LANKA, Nailur 22: Ha ka jingïakhun kaba itynnad bad kaba ïakhaid bha ka kynhun ki rangïalehkai phutbol U-17 jong ka India ka la lah ban pynliem noh ïa ka Pakistan da 3-2 kol ha ka Racecourse International Stadium ha Colombo ha ka sngi Nyngkong, 22 tarik Nailur, 2025, ban pynjlan ïa ka jingjop bad ban kiew ha khlieh duh jong ka Group B ha ka SAFF U-17 Championship 2025. Ka jingïakhun ka la ïakhaid da mar 1-1 kol ha ka kylla miet.
Kane ka jingïakhun ka la ïohi ïa u rangïalehkai ba la mih bujli u Rahan Ahmed uba la thep ïa ka kol pynjop ha ka minit kaba 73 ban pynkut ïa kane ka jingïakhun kaba itynnat. Kiwei pat ki kol na ka bynta ka kynhun India ki la wan lyngba u Dallalmuon Gangte (31’) bad u Gunleiba Wangkheirakpam (63’), katba ka Pakistan ka la pynkhihjar lyngba ka penalty jong u Muhammad Abdullah ha ka minit kaba 43 bad ka kol jong u Hamza Yasir ha ka minit kaba 70.
Ka jingïakhun ka la long kaba ïaryngkat bor ha ki minit ba nyngkong, hynrei ka India ka la paw kum ka kynhun kaba kham khlaiñ, da kaba pyrshang ban shim kabu ïa ki jingduna kaba shadien jong ka Pakistan da ka rukom ïalehkai kaba stad bad ka rukom pashat bol kaba thikna. Ka kabu kaba paka kaba nyngkong jong ki ka la wan ha ka por ba u Gangte u la pashat ïa ka bol na ka bynta u Kamgouhao Doungel, hynrei ka jingpyrshang jong u Kamgouhao Doungel la ïoh kem da kaba suk da u Saamar Razzak nongap kol jong ka Pakistan.
Dei ha ka minit kaba 31 ba ka India ka la ïoh ban lamkhmat ïa ka jingïalehkai lyngba u Dallalmuon Gangte, hynrei ïa kane la shah pynïakhaid noh ha ka minit kaba 43 na u Muhammad Abdullah lyngba ka penalty, kaba la pynkut ïa ka kylla step da mar 1-1 kol.
Katto katne minit ba la ïaid ka kylla miet u Wangkheirakpam u la buh biang hakhmat ïa ka India da kaba pynkhih ïa ka kol ha ka minit kaba 63, tang ban shah pynïakhaid biang ha u Hamza Yasir na ka bynta ka Pakistan ha ka minit kaba 70.
Hynrei tang hadien 3 minit u Rahan Ahmed (73’) u la thep ïa ka kol kaba kongsan tam ban khur ïa ka jingjop.
Ki rangïalehkai U17 jong ka India kiba la mih madan hynne ka sngi: Manashjyoti Baruah (GK), Maldino Singh Yumnam (Lawmsangzuala None, 79), Indra Rana Magar (Korou Meitei Konthoujam, 83), Shubham Poonia, Thanggoumang Touthang, Kamgouhao Doungel, Dallalmuon Gangte (Azlaan Shah, 60), Md Aimaan Bin, Hrishikesh Charan Manavathi (Rahan Ahmed, 45), Wangkheirakpam Gunleiba, Denny Singh Wangkhem (C).
