DUBAI, Lber 09: Ka kynhun ïalehkai kriket jong ka India ka la ïoh ban rah ïa ka nam lahduh jong ka ICC Champions Trophy, hadien ba ka la pynliem noh ïa ka New Zealand ha ka jingïakhun ïa ka final ba la long ha ka sngi U Blei, ha Dubai.
Ka India ka la wan beh nadien ïa ka thong da kaba kamai 252 ron ban jop da 4 wiket bad ban kyntiew ïa ka rekod jong ka ban rah lai sien kum ka lahduh ha kane ka lympung (2002 bad 2013). U kapten jong ka kynhun, u Rohit Sharma u la lamkhmat ha ka tied da kaba kamai 76 ron ban buh ïa ka India ha ka jingkyrmen haba ka wanphai ban beh ïa ka thong.
Lah ban ong ba ka India ka la don jingkyrmen lypa shuwa ban shimti ïa ka pali tied bad ka jingai khublei ka long sha ki rangkawang bol spin jong ka, ha kaba sa shi sien ki la lah ban khanglad ïa ka New Zealand tang na bynta 251-7 naki 50 ober.
U Daryl Joseph Mitchell u la noh synñiang da kaba kamai 63 ron naki 101 bol, katba u Micheal Bracewell u la tied 53 ron naki 40 bol. Napdeng ki rangkawang bol ba kham seisoh jong ka India udei u Kuldeep Yadaw uba la khur 2-40.
Ka India kaba la jop baroh shilynter ki jingïakhun ha kane ka lympung, ka la sdang tyngeh bha ha kaba ïakhun ban kynjoh ïa ka 252. Katba ki nongtied jong ka kynhun (India) ki la nang pynjan ïa ka ron sha ka thong hynrei ha ka shi khyllipmat ka la duh noh lai wiket na ka bynta 17 ron, ba kynthup ïa u kapten Rohit Sharma uba kamai 76 ron, bad u Virat Kohli ba kamai tang 1 ron.
U Shreyas Iyer u la shimti pat ban kamai 48 ron bad u Axar Patel u ba la noh synñiang 29 ron bad iehnoh satang 49 ron ba ka India ka donkam ban ïoh na ki 51 bol.
Hadien nangta, u Hardik Pandya u la nang pynjan shuh ïa ka India, hynrei u la hap noh tang na bynta 18 ron, shuwa ba u KL Rahul un ïaineh haduh kaba kut (not out) da kaba kamai 34 katba u Ravindra Jadeja u la thlieh khatduh ïa ka ron ban pynjop da kaba pynsah sa 1 ober.
Jingkheiñ ba lyngkot:
New Zealand 251-7 (50 overs): Mitchell 63 (101), Bracewell 53 (40); Kuldeep 2-40, Chakravarthy 2-45
India 254-6 (49 overs): Rohit 76 (83); Bracewell 2-28, Santner 2-46
