Ahmedabad, Nohprah 01: Ka India ka la wanphai nadien ban pynliem ïa ka Iran da 2-1 kol ha ka jingïakhun ïaknieh rung (Qualifier) kaba la long EKA Arena ha Ahmedabad ha ka sngi U Blei ban pynthikna ïa ka jak ha ka lympung AFC Under-17 Asian Cup 2026.
Kane kan dei ka jingïashim bynta kaba 10 jong ka India ha kane ka lympung ïalehkai jong ka dewbah Asia: ka la ïalehkai mynshwa ha ki snem 1990, 1996, 2002, 2004, 2008, 2012, 2016, 2018, bad u snem 2023. Ka jingïalehkai kaba seisoh tam jong ka ri ha kane ka lympung ka dang sah hi ka jingïohrung sha ka Quarterfinal ha u snem 2002 bad 2018.
Shuwa ban jam sha ka jingïakhun pyrshah ïa ka Iran, ki khynnah ïalehkai jong u Bibiano Fernandes ki donkam ïa ka jingjop ban ïohrung, katba ka Iran kan donkam tang da kaba ïakhaid ban pynskhem ïa ka jaka jong ki ha ka lympung ïalehkai jong u snem ban wan.
Ka kol kaba la thep da u Amirreza Valipoor ha ka minit kaba 19 ka la pynlong ïa ka Iran ba kan lamkhmat ïa ka jingïalehkai hashwa ba u kapten jong ka India u Dallalmuon Gangte u la pynkhihjar na ka penalty ha ki minit pynjlan jong ka kylla step (45+1’) ban pynïakhaid.
Ka jingwanphai jong ka India ka la long kaba dep pura hadien ba ka bol ba la pyrshang da u Gunleiba Wangheirakpam ka la tyngkhuh khyndiat ïa ki nongïalehkai ka liang pyrshah shuwa ba kan rung jlang shapoh kol. Kane ka la pynlong ïa ka India ban lamkhmat ha ka sien kaba nyngkong ïa ka jingïakhun ha ka minit kaba 52 bad kaba dei artad ka kol jong ka jingjop.
Ka jingjop kamut ba ka India ka la kyntiew ïa ka jingkheiñ sha ka hynñiew poiñ, kaba ïaryngkat bad ka Iran hynrei ka la ïalam hakhmat ïa ka Group D namar ka bat ïa ka rekod jingjop pyrshah ïa ka Iran (head-to-head) ban pynthikna ïa ka jingïoh rung sha ka lympung ba ka ri kan hap ban aireng pyrshah ïa ki ri ba khlaiñ bor ha ka phutbol jong ki samla Asia.
Kane ka dei ka kynhun kaba saw jong ka India kaban ïakhun ha ka Asian Cup ha u snem ban wan, hadien ka jingïohrung ka kynhun ïalehkai ba la rangbah jong ki kynthei, nangta ka kynhun U-20 jong ki kynthei, bad ka kynhun ki kynthei U-17.
