Pynliem ka Friends United CC ïa ka Mawryngkneng, ka Laitjem CC ïa ka Mawlong CC

Shillong, Jymmang 26: Ka Friends United CC bad ka Laitjem CC ki la khur jingjop ha ka lympung ïalehkai District League T20 Cricket Tournament 2022 ba pynïaid da ka East Khasi Hills Cricket Association ha ki jingïakhun ha ka sngi Palei.
Ka Friends United CC Sohra ka la pynliem da 5 wicket pyrshah ïa ka Mawryngkneng CC katba ka Laitjem CC ka la pynliem da 5 wicket pyrshah ïa ka Mawlong CC. Haba phai sha ka jingïakhun kaba nyng kong hapdeng ka Friends United CC bad Mawryng-kneng, ka Friends Unted kaba la jop ïa ka jingkynting pisa ka la ailad tied nyngkong ïa ka Mawryngkneng CC ha kaba kane ka kynhun ka kamai 129 ron bad duh noh 6 wicket ha baroh 20 over, u Felix Kharsati udei uba kamai bun ron tam da 40 ron na ki 34 bol katba u Wansiewdor Lyndem u khur mawei 3 wicket ai kamai 14 ron ha ki 4 over na bynta ka Friends United.
Haba wan beh ïa katei ka thong, ka Friends United CC ka la lah ban pyndep tang ha ki 18.1 over da kaba kamai 130 ron duh noh 5 wicket. U Kitdor Majaw u kamai 44 ron na ki 34 bol na bynta ka Friends United katba u Nangshai Nongpluh jong ka Mawryngkneng CC u khur 3 wicket ai kamai 16 ron ha ki 4 over bad ïa ka nam Player of the Match la ïoh da u Wansiewdor Lyndem jong ka Friends United CC.
Ha ka jingïakhun kaba ar, ka Mawlong CC ka la kam ban tied nyngkong hadien ba ka la jop ïa ka jingkynting pisa bad ka kamai 159 ron hap noh 10 wicket ha ki 19.3 over, kiba la kamai bun ron na bynta kane ka kynhun ki kynthup ïa u Bantei Soh Malngiang u kamai 27 ron na ki 14 bol bad u Ritchie Diengdoh u kamai 26 ron na ki 17 bol. U Anthony Pathaw u khur 3 wicket ai kamai 43 ron ha ki 4 over bad u Rokerben Kharpuli 3 wicket ai kamai 24 ron ha ki 3.3 over kiba khur wicket bun tam na bynta ka Laitjem CC.
Ka Laitjem CC ka la pyndep ïa ka thong da kaba kamai 163 hap noh 5 wicket ha ki 18.4 over bad u Poilang Thawmuit u kamai ïa ka shiteng spah ron da 53 ron ha ki 39 bol bad u Banlam Kharsati of u kamai 47 ron ha ki 32 bol, kiba dei ki arngut ki rangtied kiba kamai bun ron tam na bynta ka Laitjem CC. Ïa ka nam Player of the Match la ïoh da u Rokerben Kharpuli.