Jowai, Lber 01: Ka Dulong CC kala jop salit da 8 ron ïa ka Khimusniang CC ha kawei na ki jingïalehkai jong ka lympung District Cricket League 2026 bala pynïaid da ka West Jaiñtia Hills District Cricket Association, ba la long ha ka sngi Saitjaiñ (28-02-2026).
Ïa ka kynting pisa la jop da ka Khimusniang CC kaba la jied ban kawang bol nyngkong, ka Dulong CC haba tied nyngkong kala kamai 187 runs bad la hap lut baroh ki wickets haki 28.4 over. Na ki nongtied jong ka, 2 ngut ki la ïoh 0 run bad 2 ngut ki la tied kham bha, u Marshal Pariat ula lehkai bha da kaba kamai 64 run na ki 56 bol kynthup kawei ka 6 run bad 7 tylli ki 4 run. U Sanki Pakyntein pat ula kamai 39 run na ki 36 bol kynthup kawei ka 6 run bad 4 tylli ki 4 run. Na ki nongkawang bol jong ka Khimusniang CC, u Lumporlan Passah ula ïoh ban pynhap 3 wicket na ki 3.4 over, katba u Kenite Bareh ula ïoh 2 wicket na ki 5 over.
Haba wan ban beh ïaka thong, ka Khimusniang CC kala kamai 179 run na ki 30 over bad hap 9 wicket bad kumta ka la duna sa 9 run ban jop. Napdeng ki nongtied jong ka, u Rimiyoo Syih ula tied 29 run na ki 30 bol kynthup 6 tylli ki 4 run, u Mar Arki Patwet ula tied 26 run na ki 22 bol kynthup 4 tylli ki 4 run, u Shlurbha Lakhon ula tied 21 run na ki 28 bol kynthup 2 tylli ki 4 run. Na ki nongkawang bol jong ka Dulong CC, u Marshall Pariat marwei ula khyrwit 5 wicket bad u Heimonmi Kyndiah u la ïoh 2 wicket na ki 6 over.
Ïaka nam Man of the Match la ïoh rah da u Marshal Pariat u nongïalehkai ka Dulong CC uba ïalehkai bha haka jingkawang bol bad ha kaba tied kumjuh.
La pyntip ka jingïalehkai haka sngi nyngkong (Monday) 02-03-2026 kan long hapdeng ka War Jaiñtia United bad ka The Legends (Lissi Pearl) ha ka por 9 baje mynstep.
