Stade de France-Paris, Jylliew 14: Ka kynhun ïalehkai jong ka Croatia ka la ïoh ban wanphai ha ryngkat ki lai point na ka jingïakhun kaba la long shabar nala ïing hadien ba ka la pynliem ïa ka France.
Ka jingïakhun ka la kut ha kaba ka Croatia ka la jop salit da shi kol ïa ka France ban ïoh khur ïa ki lai point ha ka jingïalehkai kaba la long ha Stade de France ha nongbah Paris.
Haba phai sha kane ka jingïalehkai, ka Croatia ka la ïoh ban plie pyrda ïa katei ka kol tang mar ïa sdang ka jingïakhun, kata ha ka 5 minit lyngba ka penalty na u Luka Modric kaba la pynlong ïa ka kynhun ban lamkhmat ïa ka kylla step.
Na ka liang jong ka France ka la ïkhun katba lah ban pynphai ïa katei ka shi kol hynrei kam shym la lah satia haduh kaba kut jong ka kylla step bad kane ka la pynlong ïa ka Croatia ban lamkhmat da shi kol.
Hadien ba la bteng ïa ka jingïakhun ha ka kylla miet, Ka kynhun ïalehkai jong ka France ka la nang kham pynkhlaiñ ïa ka rukom ïalehkai hynrei kane kam shym la ïarap satia ban ïoh pynphai ïa katei ka shi kol.
Watla kata ruh, ki rangïalehkai ka France kim shym la kynrandien na kane ka jingïalehkai bad ïakhun katba lah ban tur shakhmat da ka jingthmu ban ïoh pynïakhaid.
Phewse, ki jingthmu kim shym lam lah ban urlong haduh kaba kut jong ka 90 minit kaba la pynlong ïa kane ka kynhun ban mad ïa ka namrem hala ïing da shi kol ha ka Croatia.
Da kane ka namrem, ka jingkhmih lynti jong ka France ban khur biang ïa ka namlahduh ka Nations League ka la kut, kaba mut ba kan nym ïohlad ban jam sha ka final ha u snem ban wan jong kane ka lympung.
Katba na ka liang jong ka Croatia ka la ïoh ban jam sha ka kyrdan ba ar jong ka Group-A da 7 point naki 4 sien ïakhun, ka France ha traiduh jong ka miej da 2 point naki 4 sien ïakhun.
