Shillong, Risaw, 12: Ka Employment Monitoring Cell jong ka Khasi Students’ Union (KSU) ha ka sngi Balang mynta ka taiew ka la buh ïa ka jingujor hakhmat jong u Director jong ka Directorate of Arts & Culture, ka Sorkar Meghalaya halor ka jingpyllait ïa kawei ka post jong Guitar Instructors hapoh ka State Institute of Arts & Culture.
Katkum ka jingpynbna ïa ka Advertisement la pyni ba kane ka post ka dei sha ka bhah jong ka Garo Category hynrei ha ka jingshisha ka dei ka bhah jong ka Khasi-Jaiñtia Category.
U kyrwoh ba la phah da u Chairman ka Employment Monitoring Cell jong ka KSU u samla Rueben Najiar u la ong, katkum ka jinglum khubor da ka seng, la tip ba ha ka Institute of Arts & Culture ki don ar tylli ki post jong ka Guitar Instructor bad uwei na kita ki nonghikai ne u instructor u dei u Khasi bad uwei pat u Garo.
La pynmih ïa ka Adverstisement na ka bynta kawei ka post ha ka 19 tarik Nailur, 2024 hadien ba la shongthait uwei na ki Guitar Instructor uba dei Khasi.
Ka seng ka la ong ba katkum ka jinglong jingman jong ka Reservation Policy, ïa kane ka post ba dang pynbna paidbah ladei ban ai sha ka Khasi-Jaiñtia Category bad ym sha ka Garo category.
Hadien ka jingïakren ïa u Director bad ïa ki nongtrei jong ka tnat Arts & Culture, ki la batai ba ki ïoh ïa ka jingbthah na ka Personnel & AR Department halor kane bad kum ka Directorate kam donbor eiei halor kane ka bynta.
Shuh shuh ka seng ka la pyntip ba ynda la tohkit bha, la lap ba dei ka Roster System kaba la pynkulmar namarba kane ka tnat ïa kaba ki Garo ki la ïohkam ha u snem 2007 la pynrung ha Khasi Jaiñtia Category kaba long ka jingleh bakla shikatdei eh. Bad mynta ba la dei sa ka pali bad pynbna paidbah ïa ka jinglait kam, la kulmar biang namarba la ai bhah biang sha ka Garo Category katba ki jaidbynriew Garo ki ladon lypa ha ka Khasi Jaiñtia Category kaba paw ba ka tarajur ka la noh shiliang ha kaba ka bhah thungkam ha kaba la leit lut 100% sha ki jaidbynriew Garo.
Ka Seng ka la kynthoh ruh da kaba ong ba kane jingleh lyndet jong ka Sorkar bad ka tnat Personnel & Administrative Reforms ka la thok bad shukor ïa ki paid Khasi Jaiñtia namarba katkum ka jingïakren bad ka soskular kaba la ai na ka liang jong ka Sorkar ki batai ba ïa ka Roster yn ym pyntreikam shadien hynrei yn pyntreikam beit shakhmat.
Halor kane ka KSU ka la kren da kaba shai ba kan ym ailad satia ba ka bhah ba dei hok ban ïoh ki paid Khasi-Jaiñtia yn pynduh pyndam noh da kaba lehbor tang da ki katto katne ngut ki briew kiba don ha ka Sorkar.
Ka Seng mynta ka dang ap ban ïoh ïa ka jubab ne ka official reply na ka Directorate of Arts & Culture bad ha kine ki sngi ki ban sa wan ka seng kan sa leit ban ïakynduh ruh ïa ki bor ba dei peit jong ka tnat Personnel & Administrative Reforms ban pynbeit halor kine ki jingkynrum kynram.
