Nongpoh, K’Lyngkot 30: Shibynta ban pynkhlaiñ ïa ka jingshakri ha kaba ïadei bad ka koit ka khiah khamtam ban pynsuk ïa ki briew kiba donkam ïa ka kali kit nongpang ban poi sha ki jaka sumar, u Bah Sosthenes Sohtun Myntri ka tnad C&RD ba dei ruh u MLA ka Jirang mynta ka sngi u la aiti bad pynlait paidbah syndon ïa kawei ka kali Ambulance sha ka Synjuk ki Seng Samla Shnong, Ri-Bhoi Sepngi Zone ha ka jingïalang kaba la long ha phyllaw ka ophis u BDO Jirang C&RD Block, bad ha katei hi kajuh ka sngi, u la ïoh ban aiti ïa ki tin sopïing sha kito ki longïing kiba donkam jingïarap, sha ki Balang ba kin ïoh pyndonkam ha ki ïingmane lem bad sha ki shnong ba kin pyndonkam ha ka ban tap ïa ki ïing Dorbar.
Ïa katei ka Ambulance la mang pisa lyngba ka Chief Minister’s Special Development Fund (CMSDF) ban shakri sha ki paidbah ka thaiñ Ri-Bhoi Sepngi. Ha kane ka sngi la sakhi ruh da ka jingdonlang u Dr. P Hajong BDO ka Jirang C&RD Block, ki nongïalam ka Synjuk ki Seng Samla Shnong, Ri-Bhoi Sepngi Zone bad kiwei kiwei ki riew rangbah. Lyngba katei ka sngi, ki la don kumba 119 tam ki longïing kiba la ïohpdiang ïa kitei ki tin sopïing, kiba kham duna ka ïoh ka kot bad khamtam eh na bynta jong kito ki longïing kiba ngat ha ka apot pluh ïing bad nalor ki longïing ba duk naka la aiti ruh sha ki ïingmane bad ïing Dorbar, ba la mang lyngba ka skim Special Rural Work Program (SRWP).
U Bah Sosthenes Sothun kum u nongmihkhmat ka thaiñ ba dei ruh ha ka juh ka por u myntri ka sorkar jylla u la ai ka jingkhublei ba kyrpang ïa u Myntri Rangbah ka jylla u Conrad K Sangma u Myntri Rangbah jong ki paidbah, u ba la pynmang kyrpang ïa katei ka Ambulance bad lyngba katei ka ambulance kan long ka jingkyrkhu ïa ki paidbah ka thaiñ Ri-Bhoi Sepngi ban dang pynkhlaiñ ka jingshakri ha kaba ïadei bad ka koit ka khiah khamtam ha ka por ba donkam kyrkieh. Ha kajuh ka por na ka liang u MLA u la pynpaw ruh ka jingsngewkmen kaba khraw hadien ba la ïoh ban aiti ruh ïa ki tin sopïing sha ki longïing ba duk ha katei ka thaiñ kiba donkam ka jingïarap shuwa ban poi ka aïom slap ba kin ïoh ban tap ïa ki ïing ki sem, bad kumjuh ruh sha ki ïingmane bad ïing Dorbar kiba la donkam ban tap tin.
Na ka liang ka Synjuk ki Seng Samla Shnong kila ai ka jingkhublei ba kyrpang ïa u MLA bad kumjuh ruh u Myntri Rangbah kiba la shimkhia ban pynurlong ïa ka jingangnud ki paidbah ban ïoh ïa ka kali ambulance na ka bynta ka jingshakri ïa kiba pang ba shitom.
