Nongpoh, Ïaiong 20: U MLA ka Umroi Consti-tuency, u Bah George B. Lyngdoh kum u kongsan mynta ka sngi u la wan ban pynlait paidbah noh ïa ka Ambulance 108kaba la mang na ka bynta ka Kyr-dem PHC ba kane ka Ambulance kan shakri na ka bynta kiba pang ba shitom khamtam ha ka por ba kyrkieh ne ki jingdonkam ha ka pang ka shitom.
Haba pynlait paidbah ïa kane ka Ambulance 108la don ryngkat ruh naduh ka District Medical & Health Officer, Dr. M. Syiemlieh, u Sordar ka Raid Kyrdem, u Bah P. Makdoh, u Dr. R. Mark, ki nongtrei na EMRI bad na ka PHC bad kynthup ki nongïalam shnong bad ki paidbah nongshong shnong ka Raid Madan Kyrdem. Ïa ka jingïalang la pynïaid da u Dr. B.S Phsngap.
Haba kren ha kane ka sngi, u George B. Lyngdoh, kum u MLA ka Umroi Constituency u la pynpaw ka jingkmen ba la lah ban pynlait paidbah ïa kane ka Ambulance, namar katei ka PHC ka donkam ïa ka Ambulance na ka bynta ban ai ka jingshakri ïa kiba pang ba shitom ha katei ka thain.
U la ai khubei ruh naduh ki nongtrei katei ka PHC kynthup ïa ki Doctor kiba la ai ka jingshakri kaba paka na ka bynta kiba pang ba shitom bad u angnud ruh ba ki paidbah bad ki nongïalam shnong ruh kin ai ka jingïatei lang na ka bynta ban shakri ïa kiba pang ba shitom ha katei ka thain bad ka Constituency hi baroh kawei.
Shuh shuh, u la pynpaw ruh ba kum u MLA ruh un dang ai ka jingïatrei lang bad un sa shim khia ruh ba kren halor ka jingeh ki paidbah khamtam ha ka liang ka tnad ka koit ka khiah bad u kyrmen skhem ruh ba katei ka Ambulance ba la pynlait paidbah kan lah ban ai ka jingshakri kaba paka na ka bynta ka jingdonkam ki paidbah.
