Pynlait paidbah ka Glenmark Foundation ïa ka kali MMU ha Umsning ban pynpoi jingsumar sha ki shnong kyndong

Nongpoh, Lber 01: Kum shi bynta ban pynkhlaiñ ïa ka jingsumar paidbah haduh ki shnong kiba jngai bad ban pynsaphriang ïa ka jingtip halor ka koit ka khiah, ka Glenmark Foundation ha jingïatreilang bad ka Society for Action in Community Health (SACH) ka la pynlait paidbah ïa ka Mobile Medical Unit kaba la tip kum ka ‘Health on Wheels’, ka kali ai jingsumar kaba thmu ban leit shakri sha ki shnong nongkyndong jong ka Ri-Bhoi.
Kane ka projek ka don ka thong ban pynkhlaiñ ïa ka rukom ai jingsumar ha ki shnong bad ban pynthikna ba ki paidbah ki ïoh ïa ka jingsumar kaba paka bad ha ka por kaba biang ryngkat ka jingangnud ba kane ka kali kan poi sha kumba 20 tylli ki shnong ha Ri-Bhoi District, ha kaba kan ai jingshakri ha khyrdop shnong, khamtam ïa ki kynthei armet, ki khynnah, ki riew rangbah bad kiwei kiba shem jingeh ban leit sha ki hospital ne PHC kiba jngai.
Ïa ka kali ‘Health on Wheels’ la pynlait paidbah ha Umsning da u Celestine Lyngdoh, MLA ka Umsning Constituency, kum u kongsan.Ha kane ka sngi la ïadonlang ruh u Sampath Kumar, Principal Secretary ka sorkar jylla, ka Sweta Monjal, Chief Communication bad CSR Officer ka Glenmark Pharmaceuticals, u KP Rajandran na ka SACH, lem bad kiwei pat ki nongtrei jong ka tnat ka koit ka khiah.
Haba ai jingkren, u Dr. Celestine Lyngdoh u la ai jingïaroh ïa kane ka sienjam kaba don jingmut bha na ka bynta ki paidbah, khamtam ha ki thaiñ nongkyndong kiba dang duna ki lad jingïoh jingsumar.
U la pynpaw ïa ka jingsngewnguh ïa ka Glenmark Foundation bad ka SACH halor ka jingïatreilang jong ki, da kaba ong ba kane ka Mobile Medical Unit kan wanrah jingmyntoi shibun bad kan long ka jingïarap kaba khraw ïa kiba donkam tam.