Shillong, Nailur, 04: Ka jingkem bad jingai jingsneng da ki Pulit ïa kawei ka kynhun ki samla buaid kiba thaw jingkulmar ha ka surok marjan bad u lum jingtep Lawmali ka la ïoh ka jingïaroh kaba khraw na ki paid nongshongshnong kiba don marjan bad kane ka jaka.
Lah ban kdew hangne ba ha ka miet Sngi Saitjain ha ka por kumba phra baje eiei ka la don ka jingïashoh ïadat kaba jur hapdeng ar kynhun ki samla ha kane ka surok ha kaba la don ka jingtim sih bad jing hylla kyrkait da kine ki samla kiba la shoh khawiang.
Katkum ka jingkhubor ba la ïoh, ki Pulit kiba la wan poi kham hadien ki la ïoh kem ïa kumba phra ngut ki samla kiba la shongshit kiad na kane ka surok ha kane kajuh ka miet.
Ki Pulit ki la ai jingsneng ïa kine ki nongthaw jingkulmar da kaba phah kynthih jakoid ïa ki ha ka jingkieng kaba pynïasoh ïa ka surok bah bad ka Riatsamthiah bad Jaïaw Shyiap – Lumpyllon.
Ïa kane ka jingai jingsneng ki Pulit ïa kine ki samla buaid la ïohi ruh ha ki dur kiba la phriang kylleng ha ki social media.
Ki nongshongshnong jong ka Jaïaw Shyiap – Lumpyllon bad Riatsamthiah ki la ai jingïaroh ïa kane ka jingleh ki Pulit bad ki la ong ba donkam ba ki Pulit kin wan ïaid pahara man ka ka por ha kane ka jaka khamtam mynmiet.
Ki la ïathuh ruh ba bunsien ki jingïashoh, ki jingkyrkait da ki ‘tiensih ‘tiensang bad bun jait ki kam huri hura ki ju jia bha na ka por sha ka por khamtam mynmiet ha kaba kiba ju mlien ban leh ïa kine ki kam ki dei ki khynnah kiba dang khie samla bad kiba la buaid kiad ne ganja.
“Ki Pulit ki dei ban wan ïaid pahara man ka por ha kane ka thain khamtam naduh Jingkieng Jingthang Briew haduh ha ka Jingkieng Lumpyllon-Riatsamthiah ha ki por mynmiet. Kiba bun ki kam huri hura ha kane ka jaka ki ju jia naduh 7 baje janmiet haduh 1 baje mynmiet haduh ba ka la pynthut ïa ki nongshong shnong bad ia ki nongleit nongwan,” la ong uwei u rangbah na Lumpyllon.
Kiwei pat ki nongshongshnong ki la kyntu ïa ki Pulit ban pynkhlaiñ ïa ka jingsyntiat khnang ban ïoh kem ïa ki briew kiba ju mlien ha kine ki kam kiba pynthut ïa ka imlang sahlang bad ban pynshitom ïa ki katkum ki kyndon jong ka Meghalaya Police Act khnang ban wanrah ïa ka suk ka saiñ ha kane ka jaka.
