Shillong, Rymphang, 03: Ki paidriewngeit jong ka Mary Immaculate Conception Church, Parish Mawkyndeng ha ka sngi u Blei ki la sakhi ïa ka jingpynkyntang Lyngdoh Sohblei ïa u Dikon Kitbok Tyngkan na ka Jingïasyllok Salesian of Don Bosco (SDB) da u Bishop jong ka Jylla Niam Jowai u Most Rev. Ferdinand Dkhar uba la long u Kongsan ha ka jinglehniam.
Ha kane ka sngi, la sakhi lang da u Provincial jong ka Shillong Province u Rev. Fr Paul Orphindro Lyngkot bad synran lang ïa u Lyngdoh bathymmai da u Parish Priest u Rev. Fr. Henry Warbah bad ki Lyngdoh kiba la sakhi lang ha kane ka sngi.
U Bishop Ferdinand haba kren sha ki paid u Blei, u la ong, “lada ki ing ki sem Khristan Katholik ki angnud ban pynmih shuh shuh ïa ki riewniam ha ka Balang ki dei ban sdang na la ing da kaba im ïa ka jingim kum ki Khristan kiba bha bad ban ïalam lynti ïa ki khun ha ka lynti kaba dei bad khamtam eh ban duwai lang manla ka sngi kum shi ing shi sem.”
“Ngi kwah ruh ba ka Balang bad ki longing longsem Khristan Katholik kin shim ïa ka jingduwai kum u païa uba khlaiñ khnang ban pynmih shuh shuh ïa ki Lyngdoh Sohblei ha ka ri Khasi-Jaiñtia,” u la ong.
“Ngi dang donkam ban pynmih shuh shuh ïa ki riewniam ha kane ka Jylla Niam jong ngi namarba ngi don ïa ka lyngkha trei kaba ïar ha ka Jylla Niam,” la ong u Bishop.
U Fr. Kitboklang Tyngkan u dei na ka shnong Mowkyndeng. U kpa jong u, u Bah Pakalang Phawa u dei na ka shnong Mutong, East Jaiñtia Hills. Ma u bad ki bahaiing hasem ki la rung sha ka Balang Katholik ha ka 18 tarik, Risaw, 1978 bad ki la long ki Khristan ba nyngkong ïa ka Balang ha ka shnong Mutong.
Ka Kmie, ka Kong Hoidien Tyngkan ka dei na ka shnong Mowkyndeng bad ka dei na ka Balang Presbytarian bad hadien ba ka la ïapoikha bad u Bah Pakalang Phawa ha u snem 1984 ka la rung noh sha ka Balang Katholik da kaba pdiang ïa ka Baptisma ha ka 25tarik, Nohprah, 1986 ha Parish Jowai.
Ïa u Fr. Kitboklang Tyngkan, la kha ha ka 6 tarik, Ïaiong, 1993 ha Mowkyndeng, West Jaiñtia Hills District. Ki don khatwei ngut shipara, san ngut ki kynthei bad hynriew ngut ki shynrangbad u Fr. Kitboklang u dei u khun u basan na ki khatwei ngut. Lai ngut ki la khladnoh, iwei i kynthei bad arngut ki shynrang.
U la ïohpdiang ïa ka Sakrament Baptisma ha ka 25 tarik, Nohprah, 1993 na u Rev. Fr. Francis Kalariparampil, SDB. U la la ïohpdiang ïa ka Kommunion Banyngkong ha u snem 2001 bad u la ïohpdiang ïa ka Sakrament Jingpynskhem ha ka 16 tarik Nailar 2007 ha Savio Juniorate, Mawlai na u Most Rev. Dominic Jala (bam kwai ha dwar u Blei).
Mynba u dang khynnah u la pule ha St. Francis Mowkyndeng naduh u snem 1997 haduh 2002 bad u la pule naduh ka klas Nursery haduh IV bad naduh klas V haduh VII u la pule ha St. Dominic Higher Secondary School, Mowkyndeng, 2003-2006.
Ha u snem 2007, u la shah jied ban leit sha Savio Juniorate Mawlai, Shillong, kum u khynnah Aspirant bad u la pyndep ïa ka klas VIII-X (2007-2010). Hadien ka klas X la phah ïa u ban leit sha Bosco Mount, Rongkhon Tura, 2010-2012 ban pyndep ïa ka klas XI bad XII.
Hadien kane, 2012-2013, u la leit sha Mariamnagar, Agartala na ka bynta ka Pre-Novitiate. Hadien ka Pre-Novitiate, 2013-2014, la phah ïa u sha Novitiate, Sunnyside, Upper Shillong bad u la shim ïa ka jingsmai riewniam ka banyngkong ha ka 24 tarik, Jymmang 2014. Hadien ka Novitiate, 2014-2016, ki bahalor ki la phah ïa u ban pule ïa ka Bachelor of Philosophy (B.Ph.) sha The Retreat, Jnanodhaya Salesian College, Yercaud, Salem distrik, Tamil Nadu.
Haba u la pyndep ïa ka B.Ph., 2016-2018, u la leit pule ïa ka Master of Philosophy (M.Ph.) ha Divyadaan, Salesian Institute of Philosophy, Nashik, Maharashtra. Ki bahalor ki la phah ïa u ban leh ïa ka Practical Training kaba ar snem 2018-2020, ha Salesian College of Higher Education, Dimapur, Nagaland. Ha ka 22 tarik Jymmang, 2020 u la shim ïa ka jingsmai bakhatduh ha Salesian College of Higher Education, Dimapur. Haba u la pyndep ïa ka practical training, 2020-2023, u la pule ïa ka Bachelor of Theology ha Sacred Heart Theological College, Mawlai, Shillong bad la pynkyntang Dikon ïa u ha ka 1 tarik Naitung, 2023 ha Scared Heart Shrine, Sacred Heart Theological College, Mawlai, Shillong.
