Shillong, Rymphang 3 : Ka ïing Bishar High Court jongka jylla ka la pynkynriah tarik ïa ka mukotduma ba ïadei bad ka jingpynkynriah ïa ki 342 tylli ki longïing na Them Metor, Them ïew Mawlong.
Ka ïing Bishar ba la khlieh da u Justice B Bhattacharjee ka la pynmih ïa kane ka hukum haba shong bishar ïa ka mukotduma ba la ujor da ka Harijan Panchayat Committee (HPC) pyrshah ïa ka High Level Committee (HLC) ka Sorkar Jylla, ha ka sngi Nyngkong.
Ka ïing Bishar ka la pynsangeh shuwa ïa kane mukotduma na ka bynta saw taiew, haba pynpaw ba ka don ka mukotduma ba don jingïadei bad ka, kaba dang sahteng ha ïing Bishar Division Bench.
“Ki nongïasaid aiñ ba mihkhmat ïa ki liang mamla ki la pyntip ïa ka mukotduma ba ïadei bad kane ka kam, kaba sahteng hapoh ka Division Bench. Namar kata, buh noh ïa kane ka kam hadien 4 taiew” ong ka ïing Bishar ha ka hukum.
Ha ka 29 tarik Kyllalyngkot, u Symbud Myntri Rangbah ba khmih ïa ki kam pynroi sor u Ma Sniawbhalang Dhar ula pyntip ba ka Sorkar kan sa pynlong ïa ka jingïalang bad ka Harijan Panchayat Committee hadien ka Dorbar Mang tyngka jong ka Jylla, ban ïakren halor ka jingpynkynriah ïa ki 342 tylli ki longïing na Them Metor, ha Them ïew Mawlong.
