Shillong, Lber 24: Ka Ministry of Home Affairs (MHA) ka Sorkar India kala pynkynriah biang ïa ka jingïalang hapdeng u Myntri kam Pohïing ka Ri u Amit Shah bad ki Myntri Rangbah ka Meghalaya bad Assam ban rai khatduh ïa ka soskular pynbeit khappud jong kine ki artylli ki Jylla ka thaiñ Shatei Lam Mihngi.
Ka Ministry of Home Affairs kala phah ktien sha ki arngut ki Myntri Rangbah ka Meghalaya bad Assam ba ka jingïakynduh ïa u Amit Shah kan long noh ha ka 29 tarik Lber ym shuh ha ka 27 tarik bala pynbeit nyngkong.
Haba pyntip ïa kane hynne ka sngi palei, u Myntri Rangbah ka Jylla Conrad Kongal Sangma ula ïathuh ba ka jing ïalang bad u Amit Shah kan long noh ha ka 29 tarik Lber ha ka por 4.30 baje janmiet.
“Kane ka khubor kala wan na ka MHA..La pynkhreh ïa ki jingdonkam baroh ha ka 29 tarik Lber” ula ong.
Dang shen, u Conrad ula pyntip hapoh ka Dorbar Mang Tyngka ka Ïingdorbar Thaw Aiñ ba ka jingiasoi ïa ka soskular ban pynbeit noh ïa ki jingïakajia ha ki 6 tylli ki jaka khappud ka Meghalaya bad Assam kan sa long ha New Delhi ha ka 27 tarik Lber.
“Ka jingiasoi ïa kane ka soskular bad ka jingiasyllok khatduh bad ka MHA kan long hapoh une u bnai ba mynta” pyntip u Conrad hapoh ka Ïingdorbar.
Ula pyntip ruh ba baroh ki Myntri ka Sorkar Jylla bad ki Heh Ophisar kiba don bynta ha ka jingïakren pynbeit pud, kin sa leit lang sha Delhi ban pynshongkun ïa kane ka sngi.
U Myntri Rangbah ka Meghalaya bad Assam kila iasoi ïa ka Memorandum of Understanding (MoU) ha ka 29 tarik u Kyllalyngkot bad la aiti sha u Myntri kam Pohïing ka Ri ha ka 31 tarik Kyllalyngkot, ban shong bishar bad ai jingmynjur da ka MHA.
