Shillong, Nailar 31 : Ka Seng Samla Mawlai Pyllun ha ka sngi Balang ka la kynduh ïa u Myntri ka tnad Arts and Culture ka sorkar jylla, Bah Sanbor Shullai ban dawa ba dei ban pynkynriah noh mardor ïa ka ktem CRPF na Mawlai bad ban tei bujli noh da ka De-addiction cum Recreational Centre.
Haba kren sha ki lad pathai khubor, u President ka Seng Samla, Bah Samuel Biam u la ong ba ki paidbah ka Mawlai ki la ai ka jingïaroh ïa ka sorkar na ka bynta ka jingpyrshang ban pynkynriah ïa ka ktem CRPF na Mawlai kumta na ka Seng ki khmih lynti ba katei ka kam kan urlong noh khnang ba kum ka shnong kan ïoh noh da ka jaka sumar ïa kito kiba kyrni ha ki jingdih bapher bapher ba kin lah pat ban wanphai biang sha ka rukom im kaba thymmai.
“Namarba kane ka jaka ba don ka ktem CRPF ha Mawlai kadei jong ka Arts & Culture Department kumta ngi la wan ban kynduh ïa u Myntri katnad kane ba un treilang bad ka tnad Social Welfare Department ban tei noh da ka De-addiction cum Recreational centre ban sumar ïa kiba kyrni ha ki jingdih pynbuaid ba kin lah ban phai biang sha ka rukom im kaba thymmai,” ong u Bah Samuel Biam.
Utei u nongïalam ka Seng u ong ruh ba ka jylla mynta ka la sakhi ïa ka jingkiew stet kiba kyrni ha u drok khamtam eh ha ki samla bad kane ka la jia wat ha Mawlai ruh. Kumta u ong ba dei na kane ka daw ki kyntu jur ïa ka sorkar ba kan wanrah noh da katei ka centre ba kyrpang ban sumar ïa ki khlem da ohdor kyrpang na kabynta kito kiba wan na ki longïing kiba duna ka ïoh ka kot. Halor kane u la ïathuh ba ki la kyntu jur ïa u Myntri ka tnad Arts and Culture ba un tuklar mardor halor kateika bynta.
