Shilong, Naitung 15: Ka Meghalaya High Court ka la pynkynriah ïa ka jingshong bishar halor ka jingkyrpad ba la ujor da u Director General of Police barim (DGP) Lajja Ram Bishnoi uba la ïakhun pyrshah ïa ka FIR kaba la ujor pyrshah ïa u ba la kynnoh ba u la pyndonkam number plate kaba thok, hadien 2 taïew.
“Kumba la kyrpad da ki party, kane ka jingshong bishar kan long ha ki artaïew,” ong ka hukum ba la mynjur da Justice B Battacharjee ha ka sngi nyngkong. Ha kane ka jingshong bishar, la aiti da counsel na ka bynta respondent No 2 ba ka la don ka jingbishar na ka liang ka State respondent la dep ban ujor. Hynrei na ka liang jong u counsel na ka liang u nongujor u la aiti ba kam shym la don ka copy kaba la ïohpdiang na ka liang jong u.
Halor kane na ka liang ka ïingbishar ka la bthah ïa u Respondent No 2 ban pynbiang ïa ki kot ki sla jong ka jingujor sha u nongkyrpad ha kaba ïadei bad kane ka kam.
Lah ban ong ba ka Meghalaya High Court ha ka 6 tarik u bnai Jylliew, ka la pynmih ïa ka interim order ban pynthikna ba kam dei ban don ka jingpyndonkam ïa ka bor pyrshah ïa u DGP barim bad kane kan ïai bteng tat haduh ban da la pynbna da kawei pat ka hukum.
Lah ban ong ba ha ka 9 tarik jong u bnai Jymmang, u heh pulit ba la shah sospon bad u Assistant Inspector General (AIG) barim ka Meghalaya Police u GK Iangrai u la ujor pyrshah ïa u Lajja Ram Bishnoi just hashwa ba un shong thait kum u DGP, halor ka jingkynnoh ba u la pyndonkam bakla bad ba u la pyndam ïa ka registration number plate jong ka kali jong u.
