Mairang, Naitung 14: Ka Hima Nongkhlaw, ka la rai ban pynkynriah noh ïa ka ïew Langstieh na ka 16 tarik sha ka 18 tarik mynta u bnai.
U Myntri Boldness Lyngdoh Nongum, u la ïathuh ba ka daw ba la pynkynriah ïa ka sngi longïew, kadei halor ka jingburom ïa u Myntri Lawrence Basaïawmoit, uwei na ki Myntri ka Hima, ha kaba ka sngi tep ïa u kan long ha ka 16 tarik mynta u bnai. Nangta ka ophis Syiem jong ka Hima ruh ka la khang naduh ka 13 haduh ka 16 tarik mynta u bnai bad kan plie pat ha ka 18 tarik.
Ha kaba ïadei bad ka jingrakhe ïa ka lyngkhuh sngi ïap jong u Tirot Sing Syiem, u Myntri Nongum , u la ïathuh ba ka jingrakhe kaba la pynbeit da ka shnong Nongkhlaw kan ïaid beit, hynrei na ka liang ka Hima pat kan pynlong da ka jingbuh syntiew ha u Motdur jong u Tirot Sing Syiem, uba don ha Mairang ha ka 17 tarik ha ka por 9 baje mynstep. Na ka liang u Myntri u wer ïa ki Sordar bad ki paidbah kat kiba lait ban ïadon lang ha kane ka jingbuh syntiew ha Mairang.
